Bota

Gjykata e Apelit nis seancën, pyetje të vështira avokatit të Trump mbi dokumentet e Mar-a-Lagos

Departamenti i Drejtësisë ka kërkuar qasje të menjëhershme tek të gjitha dokumentet e sekuestruara, megjithë kërkesën e avokatëve të Trump për të përjashtuar një pjesë të tyre.

23 Nëntor 2022, 22:52 Nga k.m.
Gjykata e Apelit nis seancën, pyetje të vështira avokatit të
Foto ilustruese

Gjyqtarët e një gjykatë federale të apelit me qendër në Atlanta, duket se anuan në krahun e Departamentit të Drejtësisë lidhur me kërkesën e këtij të fundit për të anuluar vendimin për emërimin e një eksperti të pavarur për të verifikuar dokumentet e sekuestruara nga FBI-ja në rezidencën e ish-presidentit Donald Trump në Florida. Sinjalet u vunë re nga një seri pyetjesh të vështira që gjykatësit i drejtuan avokatit të Trump.

Një trupë prej tre gjyqtarësh dëgjoi argumentet në çështjen e ngritur nga departamenti kundër emërimit të një eksperti të pavarur të posaçëm. Po kështu, Departamenti i Drejtësisë ka kërkuar qasje të menjëhershme tek të gjitha dokumentet e sekuestruara, megjithë kërkesën e avokatëve të Trump për të përjashtuar një pjesë të tyre.

Ky ishte një prej disa problemeve ligjore me të cilat Trump u përball të martën, një javë pasi shpalli vendimin për të kandiduar për herë të tretë për Shtëpinë e Bardhë. Po dje, Gjykata e Lartë i hapi rrugën një komisioni të Kongresit, të udhëhequr nga demokratët, për të shqyrtuar deklaratat e tij tatimore.

Avokati i Trump, James Trusty, u tha gjyqtarëve në Atlanta se statusi i Trump si ish-president, e bën përplasjen mbi dokumentet, një rast të pazakontë, ndaj dhe çëshja duhej të rishikohej nga një ekspert i posaçëm. Por gjyqtari kryesor, William Pryor, ngriti vazhdimisht pyetjen mbi pasojat e lejimit të një gjykate për të ndërhyrë në një hetim penal, përpara ngritjes së një aktakuzë, duke e parë atë si një preçedent serioz që do të dëmtonte hetime të tjera në të ardhmen.

Pryor kërkoi gjithashtu të dijë nëse avokatët e Trump kishin ofruar ndonjë provë për ndonjë veprim të paligjshëm nga ana e departamentit, lidhur me mënyrën se si ishin sekuestruar dokumentet.

"Nëse nuk mund ta vërtetoni një gjë të tillë, nuk e kuptoj se për çfarë jemi mbledhur?!", u shpreh Pryor.

Trusty pranoi se kontrolli i rezidencës së Trump nuk ishte trajtuar ndryshe nga një hetim tipik penal, me përjashtim të faktit se në këtë rast bëhej fjalë për një ish-president.

Avokati i Departamentit të Drejtësisë, Sopan Joshi i tha gjykatës se departamenti nuk kishte ndeshur në ndonjë rast më parë kur një gjyqtar ndalonte një hetim penal në vazhdim, kur nuk kishte prova për një kontroll të paligjshëm nga qeveria.

Në një kontroll të miratuar nga gjykata, agjentët e FBI-së sekuestruan në 8 gusht rreth 11,000 dokumente në rezidencën e Trump në Mar-a-Lago, mes tyre rreth 100 të shënuara si të klasifikuara, kjo si pjesë e një hetimi penal mbi posedimin dhe mënyrën e trajtimit të dokumenteve qeveritare nga ana e ish-presidentit me përfundimin e mandatit të tij.

Të premten e javës së kaluar Prokurori i Përgjithshëm Merrick Garland emëroi prokuror të posaçëm, Jack Smith, për të marrë përsipër këtë hetim, vetëm tre ditë pasi Trump njoftoi se do të kandidonte për zgjedhjet presidenciale të vitit 2024./VOA

donald trump

Sondazh

Poll

MË SHUMË