Bota

ME VIDEO- Qeveria e El Salvador nuk ka mëshirë; shkatërrojnë gurët e varreve të anëtarëve të bandës

Eshtrat e të vdekurve u lanë aty ku ishin groposur, ndërsa Qeveria ende nuk ka specifikuar saktësisht se sa gurë varri të anëtarëve të bandës janë shkatërruar.

4 Nëntor 2022, 08:49 Nga k.m.
ME VIDEO- Qeveria e El Salvador nuk ka mëshirë; shkatërrojnë
Foto nga aksioni

SAN SALVADOR- Qeveria e El Salvadorit po shkatërron gurët e varreve të anëtarëve të bandave, të tilla si MS-13, për të parandaluar shndërrimin e tyre në vende kulti. Po ashtu, kërkon edhe që të përcjellë një mesazh,

"Në këtë vend, nuk ka më vend për bandat,"-kështu u shpreh  zëvendësministri i Drejtësisë Osiris Luna, duke shpjeguar se shkatërrimi i gurëve të varreve ka për qëllim të parandalojë anëtarët e bandave të "nderojnë" bashkëpunëtorët e tyre të vdekur. Gurët e varreve u vandalizuan të martën dhe të mërkurën, në mes të festës së Ditës së Gjithë Shenjtorëve, në një varrezë komunale në qytetin Santa Tecla, dhjetë kilometra në perëndim të kryeqytetit San Salvador.

Eshtrat e të vdekurve u lanë aty ku ishin groposur, ndërsa Qeveria ende nuk ka specifikuar saktësisht se sa gurë varri të anëtarëve të bandës janë shkatërruar. Zëvendësministri i drejtësisë ngarkoi pamjet që tregojnë disa gurë varri që lexojnë MS-13, akronimi i bandës "Mara Salvatrucha", ndër më të dhunshmit dhe më të pamëshirshmit në El Salvador.

Luna u kërkoi qytetarëve të tregojnë vendndodhjen e gurëve të varreve të anëtarëve të bandave që nuk janë gjetur ende, në mënyrë që t'i shkatërrojnë dhe ato. Më shumë se 55,000 të dyshuar "mareros", anëtarë të bandave janë arrestuar në vendin e Amerikës Qendrore që kur Presidenti Naguib Bukele u shpalli "luftë" në fund të marsit.

Pas një serie prej 87 vrasjesh që i atribuohen bandave, kreu 40-vjeçar i shtetit i kërkoi Kongresit, i cili kontrollohet nga partia e tij "Ide të Reja", të miratojë vendosjen e një gjendjeje të jashtëzakonshme, duke pezulluar të drejtat kushtetuese. Operacioni në shkallë të gjerë i ka dhënë presidentit popullaritet rekord në shtetin prej 6.5 milionë banorësh, pavarësisht kritikave nga grupet e të drejtave të njeriut, të cilat kanë theksuar pezullimin e pothuajse të gjitha garancive ligjore dhe burgosjen e shumë të pafajshmëve.

Që kur Bukele mori detyrën në qershor 2019, shkalla e vrasjeve në El Salvador është më shumë se përgjysmuar. Vitin e kaluar, media vendase dhe ndërkombëtare publikuan raporte se ulja ishte pjesërisht për shkak të negociatave sekrete të qeverisë me drejtuesit e burgosur të bandave, të cilat mohohen kategorikisht nga shteti.

Bandat, veçanërisht MS-13, u krijuan në SHBA pas valës së emigracionit në Amerikën e Veriut për shkak të luftës civile në El Salvador (1979-1992). Më pas, dëbimet masive të kriminelëve nga autoritetet amerikane në këtë vend dhe në shtetet e tjera të Amerikës Qendrore shkaktuan metastazën e veprimit të tyre.

Autoritetet në San Salvador vlerësojnë se MS-13, banda rivale "Barrio 18" dhe organizata të tjera më të vogla kriminale kanë një total prej rreth 70,000 anëtarësh. Qeveria e El Salvadorit po ndërton aktualisht një burg gjigant me një kapacitet nominal prej 40,000 për të vendosur atje të gjithë kriminelët dhe fajtorët.

el salvador

Sondazh

Poll

MË SHUMË