Bota

Protestat në Iran/ Familja e Mahsa Amini kërcënohet me vdekje

Mahsa u bë një simbol i represionit iranian pas arrestimit të saj nga policia e moralit, e cila e akuzoi atë për veshjen e pahijshme të hixhabit.

10 Tetor 2022, 16:31 Nga I.A

Mahsa Amini

IRAN- Familja e Mahsa Amini, vajzës kurde 22-vjeçare vdekja e së cilës në paraburgimin policor tre javë më parë shkaktoi protesta në të gjithë Iranin, thonë se kanë marrë kërcënime me vdekje dhe janë paralajmëruar të mos përfshihen në demonstrata. BBC shkruan që Mahsa u bë një simbol i represionit iranian pas arrestimit të saj nga policia e moralit, e cila e akuzoi atë për veshjen e pahijshme të hixhabit. Fytyra e saj dhe historia e saj tashmë janë të njohura në mbarë botën.

"Familja jonë ka qenë nën presion të jashtëzakonshëm nga zyrtarët e Republikës Islamike, kështu që ne nuk flasim me organizata apo kanale të të drejtave të njeriut jashtë Iranit dhe nuk informojmë askënd nga bota e jashtme për vdekjen e saj," më tha kushëriri i saj Erfan Mortezai.

Erfani është një luftëtar Peshmerga për Komala, një parti opozitare kurde iraniane në mërgim me bazë në Irak. Prej vitesh, shumë kohë përpara vdekjes së Mahsa, ai është përpjekur të rrëzojë Republikën Islamike. Qeveria iraniane ka fajësuar për trazirat e fundit ndikime të tilla të jashtme.

Familja e Mahsa Amini në Iran, duke përfshirë babain dhe xhaxhain e saj, kanë mohuar vazhdimisht mbështetjen e grupeve opozitare kurde, të cilat Irani i akuzon për separatizëm. Ndërsa flasim në hijen e maleve, ai përdor emrin e saj kurd, Zhina, atë që miqtë dhe familja e saj e thërrisnin çdo ditë. Mahsa është emri i saj zyrtar iranian, të cilin prindërit e saj u detyruan ta përdornin në dokumentacion sepse disa emra kurdë janë të ndaluar në Iran.

“Zhina ishte një njeri normal, nuk ishte politike. Regjimi ka sajuar skenarë dhe dezinformata, duke thënë se Zhina ishte në kontakt me mua dhe unë e mësova dhe e ktheva në Iran për të bërë një aktivitet të caktuar, ndërsa në fakt kjo është krejtësisht e pabazë”, këmbëngul Erfani.

Ai thotë se kërcënimet që kanë marrë familjarët e tij i kanë bërë ata të vënë në dyshim sigurinë e tyre.

“Ata janë nën torturat e Republikës Islamike. Zyrtarët e regjimit na kanë kërcënuar përmes Instagramit me llogari të rreme dhe u kanë thënë familjarëve në Iran se nëse përfshihen në protesta, mund të vriten,” më thotë ai.

mahsa amini erfan mortezai protestat ne iran