Bota

OKB thirrje talebanëve: Rihapni shkollat ​​e vajzave, lërini të kthehen në rrugën e dijes

Sipas OKB-së, "më shumë se një milion vajza", kryesisht të moshës 12 deri në 18 vjeç, u penguan të shkonin në shkollë vitin e kaluar, gjë që nuk ishte rasti për djemtë, pasi shkollat ​​e mesme për to u rihapën më 18 shtator 2021.

18 Shtator 2022, 11:00 Nga d.a.
OKB thirrje talebanëve: Rihapni shkollat ​​e vajzave, lërini
vajzat afgane

AFGANISTAN- OKB-ja u ka bërë thirrje edhe një herë talebanëve të marrin "masa urgjente" për të rihapur shkollat ​​e mesme të vajzave në Afganistan, duke e quajtur mbylljen e tyre njëvjeçare "të paprecedentë" dhe "të dënueshme".

“Sot të dielën bëhet një vit që kur vajzat në Afganistan janë përjashtuar nga arsimi i mesëm. Një vit njohurish dhe mundësish të humbura që nuk do të gjenden më kurrë. Vajzat kanë një vend në shkollë. Talibanët duhet t'i lënë ata të kthehen”, shkroi në Twitter Sekretari i Përgjithshëm i OKB-së, Antonio Guterres.

Sipas OKB-së, "më shumë se një milion vajza", kryesisht të moshës 12 deri në 18 vjeç, u penguan të shkonin në shkollë vitin e kaluar, gjë që nuk ishte rasti për djemtë, pasi shkollat ​​e mesme për to u rihapën më 18 shtator 2021.

"Është një përvjetor tragjik, i turpshëm që mund të ishte shmangur. Nuk ka asnjë justifikim të besueshëm për përjashtimin e vazhdueshëm të vajzave nga shkollat ​​e mesme”, shtoi ai, duke theksuar se “askund në botë nuk ndodh diçka e tillë. Kjo dëmton thellësisht një brez vajzash dhe të ardhmen e Afganistanit. Mohimi i arsimit cenon të drejtat më themelore të grave dhe vajzave. Rrit rrezikun e tyre të margjinalizimit, rrezikun e dhunës, shfrytëzimit dhe abuzimit ”, komentoi sot Markus Potzel, ushtrues detyre i Misionit të Asistencës së OKB-së në Afganistan (UNAMA).

Pas kthimit në pushtet më 15 gusht 2021, talebanët kanë vendosur kufizime të rënda për gratë dhe vajzat, ata mbyllën shkollat ​​e mesme të vajzave në shumicën e provincave dhe i ndaluan ato të punojnë në sektorin publik. Në të njëjtën kohë, ata u kërkuan që të mbulohen plotësisht kur janë jashtë shtëpisë së tyre.

Pas marrjes së pushtetit në Afganistan në verën e vitit 2021, talebanët ndaluan vajzat të shkonin në shkollë. Më 23 mars, shkollat ​​e mesme të vajzave ishin të hapura vetëm për disa orë përpara se talebanët të shpallnin mbylljen e tyre përsëri. Lëvizja islamiste që atëherë ka pohuar se ato mbeten të mbyllura për shkak të një "problemi teknik" dhe do të rihapen sapo të finalizohet një orar i bazuar në rregullat islamike.

talebanet qeverisin afganistanin okb thirrje talebaneve antonio guterres

Sondazh

Poll

MË SHUMË