Bota

VD-Funerali i 'vetmuar' i Gorbaçov, lamtumira e liderit të fundit sovjetik pa praninë e Putinit

Pavarësisht se Londra, Parisi dhe Berlini e vlerësojnë Gorbaçovin për kontributin e tij në përfundimin e Luftës së Ftohtë, pushtimi rus i Ukrainës ka rritur tensionet midis Perëndimit dhe Moskës.

3 Shtator 2022, 08:04 Nga d.a.
VD-Funerali i 'vetmuar' i Gorbaçov, lamtumira e liderit të
Funeral i Gorbaçov

RUSI- Asnjë lider evropian nuk pritet të marrë pjesë në funeralin e liderit të fundit të Bashkimit Sovjetik, Mihail Gorbaçov, që do të mbahet në Moskë mëngjesin e sotëm, ku mungon edhe presidenti rus Vladimir Putin.

Sipas mediave, pavarësisht se Londra, Parisi dhe Berlini e vlerësojnë Gorbaçovin për kontributin e tij në përfundimin e Luftës së Ftohtë, pushtimi rus i Ukrainës ka rritur tensionet midis Perëndimit dhe Moskës.

Për shkak të sanksioneve të vendosura ndaj Rusisë dhe kundërmasave ruse, fluturimet komerciale ndërmjet vendit dhe vendeve anëtare të BE-së janë ndalur.Në të njëjtën kohë, Moska, në përgjigje të sanksioneve perëndimore, ka ndaluar hyrjen e politikanëve perëndimorë në territorin e saj.

Kancelari gjerman Olaf Scholz tha se nuk kishte marrë një ftesë për të marrë pjesë në funeralin e Gorbaçovit. Paraardhësja e tij Angela Merkel e refuzoi ftesën, duke përmendur një lëndim në gju.

Megjithatë, në ceremoni do të marrin pjesë diplomatë dhe ambasadorë, përfshirë ambasadorin francez në Moskë Pierre Levy, si dhe amerikanin John Sullivan.

Të enjten, Putin shkoi në spitalin e Moskës ku 91-vjeçari Gorbaçov vdiq pas një "sëmundjeje të gjatë dhe të rëndë". Presidenti rus vendosi një buqetë me trëndafila të kuq pranë arkivolit të hapur të liderit të fundit të BRSS, mbajti një minutë heshtje dhe uli kokën në shenjë respekti.

Megjithatë, në Rusi nuk u shpall ditë zie kombëtare, megjithëse, siç nënvizoi Kremlini, ceremonia e tij do të ketë "të gjitha elementet e një funerali shtetëror".

Vajza e Gorbaçovit, Irina, është shprehur se ceremonia do të jetë modeste dhe do të zhvillohet sot në orën 10:00. Trupi i tij do të ekspozohet në Sallën e Kolonave, Shtëpia e Sindikatave, pranë Kremlinit, siç ishte tradicionalisht rasti me udhëheqësit sovjetikë. Ai do të varroset në varrezat Novodevichy të Moskës, pranë gruas së tij Raisa, e cila vdiq në 1999.

Mihail Gorbaçov vdiq në moshën 91-vjeçare pas një sëmundjeje të gjatë dhe të rëndë, njoftoi spitali i Moskës ku po trajtohej. I vlerësuar me Çmimin Nobel për Paqen për rolin e tij në lehtësimin e konfliktit Lindje-Perëndim shekullin e kaluar, Gorbachev kaloi 20 vitet e fundit në periferi të jetës politike, megjithatë ai vazhdimisht e ka ngritur zërin të dëgjohet teksa shqetësohet për tensionet në rritje mes Moskës dhe Uashingtonit.

vdes mihail gorbacov vladimir putin funerali i gorbaçov

Sondazh

Poll

MË SHUMË