Bota

Shefi i OKB ngre alarmin për përmbytjet në Pakistan: Situata është e rëndë, shkak ndryshimet klimatike

Guterres i kërkoi botës që t'i vijë në ndihmë Pakistanit, ndërsa ai nisi një apel prej 160 milion dollarësh për të ndihmuar dhjetëra miliona të prekur nga katastrofa. Ai fajësoi "ndikimin e pamëshirshëm të niveleve epokale të shiut dhe përmbytjeve".

30 Gusht 2022, 13:34 Nga d.a.
Shefi i OKB ngre alarmin për përmbytjet në Pakistan: Situata
Permbytje ne Pakistan

PAKISTAN- Pakistani po përballet me "një muson mbi steroid", ka paralajmëruar Sekretari i Përgjithshëm i OKB-së Antonio Guterres, pasi përmbytjet pushtuan një të tretën e vendit.

Sipas BBC, Guterres i kërkoi botës që t'i vijë në ndihmë Pakistanit, ndërsa ai nisi një apel prej 160 milion dollarësh për të ndihmuar dhjetëra miliona të prekur nga katastrofa. Ai fajësoi "ndikimin e pamëshirshëm të niveleve epokale të shiut dhe përmbytjeve".

Në një video-mesazh, Guterres e quajti Azinë Jugore një "pikë të nxehtë të krizës klimatike", ku njerëzit kishin 15 herë më shumë gjasa të vdisnin nga ndikimet klimatike.

"Le të ndalojmë së ecuri në gjumë drejt shkatërrimit të planetit tonë nga ndryshimet klimatike. Sot, është Pakistani. Nesër, mund të jetë vendi juaj."-tha Guterres.

Ai tha se apeli i OKB-së synonte t'u siguronte 5.2 milionë njerëzve ushqim, ujë, kanalizime, arsim emergjent dhe mbështetje shëndetësore. Zyrtarët vlerësojnë se më shumë se 33 milionë pakistanezë, një në shtatë persona, janë prekur nga përmbytjet..

Pakistani prodhon më pak se 1% të emetimeve globale të gazeve serrë, por renditet vazhdimisht në top 10 vendet më të cenueshme ndaj efekteve të ndryshimeve klimatike. Shumë faktorë kontribuojnë në përmbytjet, por një atmosferë ngrohëse e shkaktuar nga ndryshimet klimatike i bën më të mundshme reshjet ekstreme.

Bota tashmë është ngrohur me rreth 1.2C që nga fillimi i epokës industriale dhe temperaturat do të vazhdojnë të rriten nëse qeveritë në mbarë botën nuk bëjnë shkurtime të mëdha të emetimeve.

Ndihma ka filluar të arrijë pasi Pakistani bëri thirrjen e tij për ndihmë. Emiratet e Bashkuara Arabe dhe Turqia kanë dorëzuar tenda dhe ilaçe, ndërsa SHBA dhe Britania janë zotuar për mbështetjen e tyre. Më herët të hënën, Fondi Monetar Ndërkombëtar tha se kishte miratuar një kredi prej 1.2 miliardë dollarësh për vendin.

Të paktën 1,136 njerëz janë vrarë që nga qershori dhe rrugët, të korrat, shtëpitë dhe urat janë shkatërruar në të gjithë vendin. Rekordi i musonit të këtij viti është i krahasueshëm me përmbytjet shkatërruese të vitit 2010, më vdekjeprurësit në historinë e Pakistanit, që lanë më shumë se 2000 njerëz të vdekur.

 

permbytje ne pakistan antonio guterres

Sondazh

Poll

MË SHUMË