Bota

Teleskopi hapësinor zbulon pamje 'të pabesueshme' të Jupiterit

Teleskopi hapësinor më i madh dhe më i fuqishëm në botë ka zbuluar pamje të paprecedentë të Jupiterit. Imazhet tregojnë aurorat, stuhitë gjigante, hënat dhe unazat që rrethojnë Jupiterin në detaje që astronomët i kanë përshkruar si "të pabesueshme".

23 Gusht 2022, 08:32 Nga s.s
Teleskopi hapësinor zbulon pamje 'të pabesueshme' të
Pamja e Jupiterit

Teleskopi hapësinor më i madh dhe më i fuqishëm në botë ka zbuluar pamje të paprecedentë të Jupiterit. Teleskopi Hapësinor James Webb (JWST) fotografoi planetin më të madh të sistemit diellor në korrik. Imazhet tregojnë aurorat, stuhitë gjigante, hënat dhe unazat që rrethojnë Jupiterin në detaje që astronomët i kanë përshkruar si "të pabesueshme". Fotografitë infra të kuqe u ngjyrosën artificialisht për t'i bërë veçoritë të dalloheshin. Kjo është për shkak se drita infra të kuqe është e padukshme për syrin e njeriut.

"Nuk e kemi parë kurrë Jupiterin kështu. Është e gjitha e pabesueshme. Ne nuk e kishim pritur me të vërtetë që të ishte kaq mirë, për të qenë i sinqertë", tha astronomi planetar Imke de Pater, nga Universiteti i Kalifornisë, i cili luajti një rol kyç në projekt, raporton BBC.

JWST prej 10 miliardë dollarësh (8,5 miliardë paund) është një mision ndërkombëtar i udhëhequr nga agjencia hapësinore amerikane Nasa me partnerët e saj nga Agjencia Evropiane e Hapësirës dhe Agjencia Kanadeze e Hapësirës. Nasa tha se në pamjen e pavarur të Jupiterit, të krijuar nga një përbërje e disa imazheve nga teleskopi, aurorat shtriheshin në lartësi të mëdha mbi polit verior dhe jugor të Jupiterit. Aurorat janë shfaqje drite në qiell të shkaktuara nga Dielli.

Ndërkohë, Njolla e Madhe e Kuqe, një stuhi e famshme aq e madhe sa mund të gëlltiste Tokën, u shfaq e bardhë. Kjo ndodhi sepse reflektonte shumë dritë dielli. JWST u lançua në dhjetor 2021 dhe aktualisht është i pozicionuar rreth një milion milje (1.6 milion km) nga Toka. Ai mund të zbulojë dritën e cila filloi të udhëtonte drejt Tokës 13 miliardë vite më parë, momente pas Big Bengut. I parë si pasardhësi i teleskopit të famshëm Hubble, JWST pritet të jetë një forcë dominuese për zbulim për të paktën 20 vitet e ardhshme.

teleskop hapesire

Sondazh

Poll

MË SHUMË