Aktualitet

Finalizohet MARRËVESHJA! Pas një muaji patentat shqiptare do të njihen edhe në Arabinë Saudite

Marrëveshja hyn në fuqi 30 ditë pas përfundimit të procedurave, si dhe do të lehtësojë lëvizjen reciproke të qytetarëve

15 Gusht 2022, 09:03 Nga A.B

Patenta

TIRANË- Ministria për Evropën dhe Punët e Jashtme, ka njoftuar se Shqipëria ka arritur një marrëveshje me Arabinë Saudite për njohjen reciproke të lejeve të drejtimit. Në njoftimin e ndarë, MEPJ bën të ditur se marrëveshja hyn në fuqi 30 ditë pas përfundimit të procedurave, si dhe do të lehtësojë lëvizjen reciproke të qytetarëve, vizitorëve dhe turistëve të dy vendeve, përmes përdorimit të patentave, si dhe konvertimin e tyre.

NJOFTIMI I PLOTË:

Përmbyllen procedurat e marrëveshjes për njohjen reciproke të lejeve të drejtimit mes Shqipërisë dhe Mbretërisë së Arabisë Saudite. Pas përfundimit të procedurave të brendshme ligjore fillimisht nga pala jonë, Ministria e Punëve të Jashtme e Mbretërisë së Arabisë Saudite ka njoftuar përfundimin e procedurave të brendshme ligjore edhe nga pala e tyre. Marrëveshja, e cila hyn në fuqi 30 ditë pas përfundimit të procedurave, do të lehtësojë lëvizjen reciproke të qytetarëve, vizitorëve dhe turistëve të dy vendeve tona, përmes përdorimit të patentave, si dhe konvertimin e tyre.

Më herët, Shqipëria ka finalizuar njohjen e patentave dhe në Gjermani e Itali.

shqiperia arabia saudite patenta njohja e patentave