Aktualitet

Vrau me skaf 7-vjeçaren, "arrest me burg" për Arjan Tasen, ish-polici: Kërkoj falje!

Sot, Prokruroria ka ngritur ndaj tij akuzën 'vrasje e kryer në formën e dashjes indirekte' dhe jo “vrasje nga pakujdesia”, që ishte akuzuar më herët.

5 Gusht 2022, 10:12 Nga k.m.
Vrau me skaf 7-vjeçaren, "arrest me burg" për Arjan Tasen,
Arjan Tase

VLORË- Gjykata e Vlorës ka vendosur masën e sigurisë “arrest me burg” për ish shefin e Komisariatit Arjan Tasen, i akuzuar për vrasjen e 7-vjeçares Jonada Avdia në Himarë pak ditë më parë. Sot, Prokruroria ka ngritur ndaj tij akuzën 'vrasje e kryer në formën e dashjes indirekte' dhe jo “vrasje nga pakujdesia”, që ishte akuzuar më herët. Me akuzën e re të ngritur nga organi i akuzës, Tase rrezikon nga 10-20 vite burg, e jo gjobë-5 vite burg. Prokurorja Eranda Laze dorëzoi një ditë më parë në gjykatë ish-shefin e policisë për akuzën e vrasjes me dashje të Jonada Avdiut ndërsa kërkoi masën e arrestit me burg, duke kërkuar rrëzimin e referimit të Policisë së Vlorës lidhur me ngjarjen.

“Nuk ka vrasje nga pakujdesia, por vrasje me dashje mbasi drejtuesi i mjetit lundrues që rezulton se kishte patentë ishte në dijeni të rrezikut që i sillte qytetarëve kur hyri në atë perimetër,”- thuhet në dosje.

Në seancën gjyqësore, Tase nuk ka kundërshtuar masën e sigurisë dhe i ka kërkuar falje familjes së të miturës dhe policisë së Shtetit. E më pas është shprehur se do të pranojë vendimin e drejtësisë për të.

Tase ka qenë ish-shef i Policisë në Himarë, ndërsa kur ndodhi ngjarja ai mbante postin e shefit të Policimit në Elbasan, por Gledis Nano e përjashtoi përfundimisht nga policia. Ngjarja e rëndë ndodhi më 2 gusht në Plazhin e Potamit. E mitura po lahej në det kur u përplas fillimisht nga pjesa ballore e gomones dhe më pas trupi i saj është prerë nga helikat duke ndërruar jetë në vend.

Fëmija, me origjinë nga Tropoja jetonte me familjen e saj në Angli, por ishte kthyer në atdhe për pushime. Për këtë ngjarje të rëndë është shkarkuar i gjithë zinxhiri drejtues i Policisë Kufitare të Vlorës, si edhe inspektorët përgjegjës, por protestuesit nuk janë mjaftuar me kaq. Ata kërkojnë dorëheqjen e ministrave Çuçi, Kumbaro dhe Nanos.

arjan tase

Sondazh

Poll

MË SHUMË