Bota

Erdogan udhëton sot drejt Rusisë, takim "kokë më kokë" me Putin

Erdogan dhe Putin do takohen për të diskutuar lidhjet dypalëshe dhe çështjet ndërkombëtare. Liderët do të takohen personalisht për herë të dytë në 17 ditë pas takimit në kryeqytetin iranian Teheran.

5 Gusht 2022, 07:35 Nga s.s

Erdogan udhëton sot drejt Rusisë, takim "kokë më

Erdogan dhe Putin

TURQI- Presidenti turk Rexhep Tip Erdogan sot do të bëjë një vizitë njëditore në qytetin bregdetar rus Soçi për t'u takuar me homologun e tij rus Vladimir Putin për të diskutuar lidhjet dypalëshe dhe çështjet ndërkombëtare. Erdogan dhe Putin do të takohen personalisht për herë të dytë në 17 ditë pas takimit në kryeqytetin iranian Teheran, ku liderët patën një takim trepalësh me presidentin iranian Ebrahim Raisi për samitin e 7-të në Astana.

Sipas anadolly,përveç Sirisë, Erdogan dhe Putin do të diskutojnë edhe për luftën Rusi-Ukrainë, e cila tashmë është në muajin e saj të gjashtë. Falë përpjekjeve diplomatike të Turqisë për të zhbllokuar eksportet e drithit ukrainas, anija e parë me drithëra që u largua nga një port ukrainas në kohë lufte kaloi nëpër ngushticat turke pasi dje mori një leje sigurie në Stamboll rrugës për në Liban për një dërgesë që besohet se po ndihmon në lehtësimin e krizës globale të ushqimit.

Dy liderët do të vlerësojnë marrëdhëniet dypalëshe, duke u fokusuar kryesisht në fushat e ekonomisë, tregtisë dhe energjisë, që përbëjnë forcën lëvizëse pas lidhjeve turko-ruse. Liderët do të shkëmbejnë mendime edhe për hapat e mundshëm për rritjen e bashkëpunimit dypalësh.

Gjatë takimit të tyre më 19 korrik, liderët dënuan praninë dhe aktivitetet e shtuara të grupeve terroriste dhe filialeve të tyre me emra të ndryshëm në pjesë të ndryshme të Sirisë. Turqia thekson vazhdimisht vendosmërinë e saj për të çrrënjosur organizatat terroriste në Siri që kërcënojnë sigurinë e saj, duke përfshirë DEASH-in dhe PKK-në, së bashku me degën e saj siriane YPG.

Turqia, OKB, Rusia dhe Ukraina nënshkruan një marrëveshje historike më 22 korrik për të rihapur tre porte ukrainase: Odesa, Chernomorsk dhe Yuzhny, për eksportet e drithit që ka ngecur prej muajsh. Anija e mallrave "Razoni" me flamurin e Sierra Leones, që transporton mbi 26,500 ton misër, është anija e parë e ngarkuar me drithëra që largohet nga porti ukrainas i Odesas dhe pasi mori lejen e sigurisë në Istanbul, anija vazhdon të lundrojë në portin libanez të Tripolit, destinacioni i saj përfundimtar.

putin takohet me erdogan erdogan putin