Bota

Sergei Lavrov: Plani italian për paqen në Ukrainë do të dështojë

Lavrov, u shpreh se dokumenti nuk duket të jetë përparimi i mundshëm që disa zyrtarë italianë pretendojnë se është.

27 Maj 2022, 11:52 Nga DOSJA

Sergei Lavrov

RUSI-Ministri i Jashtëm rus Sergei Lavrov, dyshon në synimet e reformimit të NATO-s, duke thënë se përpjekjet për ta transformuar atë në “një aleancë globale në kërkim të dominimit ushtarak në mbarë botën” janë të destinuara të dështojnë. Rusia nuk beson në një propozim paqeje në Ukrainë, të cilin qeveria italiane thuhet se e ndau me Kievin dhe aleatët perëndimorë.

Sipas mediave të huaja, Lavrov, u shpreh se dokumenti nuk duket të jetë përparimi i mundshëm që disa zyrtarë italianë pretendojnë se është.

“Ata po planifikojnë ta transformojnë këtë ‘bashkim mbrojtës’ në një aleancë globale që kërkon dominimin ushtarak në botë. Është një rrugë e rrezikshme, ajo do të dështojë. Ministri i Jashtëm italian Luigi Di Maio ka qenë aktiv në media duke promovuar nismën italiane me katër pika. Por ne vetëm lexuam për të. Një politikan serioz që dëshiron rezultate në vend të vetëpromovimit para votuesve thjesht nuk mund të propozojë gjëra të tilla,” tha Lavrov.

Ai shpjegon se Krimea dhe Donbasi nuk do të kthehen kurrë në kontrollin e Kievit. Dhe më pas ai lëshon një paralajmërim të ashpër për NATO-n, armët e së cilës në Ukrainë, nëse godasin territorin rus, do të shkaktonin një përshkallëzim të sigurt.

NATO, përfundon ai, “ishte një organizatë mbrojtëse kur ishte dikush nga i cili duhej të mbrohej”. Fjalët e tij vijnë pak orë pas bisedës telefonike mes Mario Draghit dhe presidentit rus Vladimir Putin.

“Plani italian për paqen” e ka propozuar Ministri i Jashtëm italian Luigi Di Maio, teksa do të përfshijë grupe ndërkombëtare si Kombet e Bashkuara, Bashkimi Evropian dhe Organizata për Siguri dhe Bashkëpunim në Evropë, të cilat do të veprojnë si lehtësues për të organizuar fillimisht armëpushime të lokalizuara.

(d.d)/dosja.al