Aktualitet

18 dhjetori- Berisha i përgatit shkarkimin, Basha jep udhëzimet e fundit(ZHVILLIMET)

17 Dhjetor 2021, 10:45 Nga DOSJA

18 dhjetori- Berisha i përgatit shkarkimin, Basha jep udhëzimet e

TIRANË– Na ndajnë vetëm pak orë nga data 18 dhjetor, ditë kur Partia Demokratike do të përfshihet sërish në një përplasje dy palëshe dhe reagimet nuk mungojnë. Kryedemokrati Lulzim Basha ka mbledhur ditën e sotme Kryesinë e PD-së, ku janë marrë një sërë vendimet në lidhje me Kuvendin që pritet të nisë ditën e nesërme. Fillimisht janë emëruar 12 krerët e rinj të degëve të PD-së, për shkak se ata që ishin u shkarkuan pasi morën pjesë në Kuvendin e 1 javë më parë të mbajtur nga Berisha. Gjatë mbledhjes së sotme gjithashtu është ngritur edhe Komisioni i Përhershëm Statutor, i cili përbahet nga Enklejd Alibeaj, Ervin Salianji, Kreshnik Çollaku, Jonila Godole, Taulant Zeneli si dhe Jorida Tabaku. Një tjetër pikë që është diskutuar është propozimi i Alibeajt, që në strukturat qendrore të PD-së mos ketë individë të shpallur ‘non grata’, e cila do të kthehet në rezolutë për demokratët duke shënjestruar kështu liderin historik, Sali Berisha. Gjithashtu është krijuar edhe një strukturë e re në PD, e cila quhet “Aleanca Qytetare për Demokraci”.

Po nesër ish-kryeministri dhe njëkohësisht lideri historik i Partisë Demokratike, Sali Berisha do të thërrasë anëtarët e saj të votojnë në një referendum më 18 dhjetor për shkarkimin e Bashës, një javë pasi vulosi me 4 mijë e 446 vota këtë vendin në Kuvendin e 11 dhjetorit që mbajti në “Air Albania”. Tashmë përgatitjet kanë nisur dhe qendrat e votimit janë përcaktuar qartë. Dega Krujë, e cila ka rreth 700 anëtarë, do të votojnë në dy qendra votimi, një në Thumanë dhe një në Krujë. Drejtuesit kanë treguar se në votim pritet të marrin pjesë rreth 50 % e anëtarëve. Në Gjirokastër janë gjithsej 1100 anëtarë të PD me të drejtë vote.

Në këtë zonë janë ngritur 4 qendra votimi për të votuar për shkarkimin e Bashës, por ende nuk ka mbërritur baza materiale për referendumin. Në Fushë-Krujë, votimi pritet të zhvillohet në një pikë të vetme, te qendra shëndetësore, ku është dhe zyra e partisë. Në bashkinë e Korçës ka një qendër votimi. Në Korçë janë 3500 anëtarë, në Pustec 3600. ndërsa në Pogradec janë 900 anëtarë. Edhe në Pogradec do të jetë po një qendër votimi. Dyert e degës së PD-së në Elbasan vijojnë të qëndrojnë të kyçura, pavarësisht se deputeti Ervin Salianji e ka mohuar një gjë të tillë. Sipas Salianjit 80% do të marrin pjesë në Kuvendin Kombëtar të Partisë Demokratike të thirrur nga kryedemokrati Lulzim Basha.

Partia Demokratike tashmë po përballet edhe në Gjykatë. Basha ka dorëzuar në Gjykatën e Tiranës për regjistrim statutin e ndryshuar në Kuvendin e Partisë Demokratike në 17 korrik, e ndërsa Komisioni për Rithemelimin e Partisë Demokratike ka depozituar ndryshimet e vendosura më 11 dhjetor në Kuvendin e mbajtur nga Berisha.

Ç’parashikon statuti i 11 dhjetorit:

*Zhbërjen e vendimit të kryedemokratit Lulzim Basha për ta përjashtuar ish-kryeministrin Sali Berisha nga grupi parlamentar i PD.

*Pas Kuvendit për 4 muajt në vijim do të ketë një Komision të Përkohshëm të Rithemelimit që merr drejtimin e ekzekutiv të PD-së deri në konstituimin përfundimtar të organeve drejtuese (deri më 22 mars 2022)

*Procesi i zgjedhjeve nis me krijimin e organeve të reja dhe paraprihet nga një proces anëtarësimesh të reja dhe verifikimin e anëtarësisë ekzistuese.

*Futja e referendumit

*Forcimi i organeve kolegjiale

*Nëse humbet zgjedhjet, pavarësisht arsyes, kryetari largohet.

Një ditë më parë kreu i Partisë Demokratike Lulzim Basha ka depozituar në Gjykatën e Tiranës ndryshimet e bëra në statut në Kuvendin e mbledhur nga PD më 17 korrik. Mësohet se çështja është regjistruar dy ditë më parë dhe është shortuar pranë kësaj gjykate. Dosja është në duart e gjyqtares Blerina Muça.

Ç’u vendos më 17 korrik?

Lulzim Basha propozoi 11 ndryshime duke përfshirë zgjerimin e kryesisë me të tjerë anëtarë dhe shtimin e numrit të sekretarëve. Kryedemokrati krijoi Këshillin Koordinues të Qarkut për organizimet elektorale, zgjeroi Kryesinë, Sekretariatet dhe shtoi strukturën e përhershme të Këshillit Koordinues të Qarkut.

Por si ka përfunduar çështja deri në këtë pikë?

Historia fillon në 9 shtator kur Lulzim Basha pezulloi Sali Berishën, tashmë “non grata” nga Amerika nga grupi parlamentar. Pas vendimit të Bashës, Berisha iu rikthye aktivitetit të tij politik, duke nisur takimet me bazën që i quajti “Foltore”. Më 11 dhjetor, Kuvendi i thirrur nga ish-kryeministri Sali Berisha votoi me 4446 fleta pro shkarkimit të Bashës. Gjithashtu u ngrit edhe një grup Komisioni i Përkohshëm me 29 anëtarët për të nisur të gjitha procedurat e nevojshme.

Pikërisht ky Komision pritet ta marrë në dorë partinë deri më 22 mars 2020 kur do të thirret një Kuvend i ri për të zgjedhur kryedemokratin e ri dhe funksionarët e tjerë. Por Basha nuk e njeh vendimin, pasi përjashtoi nga Këshilli Kombëtar i PD-së, të gjithë mbështetësit e Berishës, duke i zëvendësuar të gjithë anëtarët e Kryesisë. Por kundërpërgjigja e vendimit të Bashës, erdhi me hyrjen në PD të Berishës dhe mbështetësve të tij. Lufta mes palëve ka nisur, por nuk dihet përfundimi…

ZHVILLIMET ORË PAS ORE:

Kukësi përgatitet për referendumin, koordinatori demokrat: Ngjan si ‘Koncert në ’36’

FT/ Referendumi për shkarkimin Bashës, publikohet lista e vendeve ku do votohet

Dje u mbyll me dryn, sot ka marrëveshje! Dega e PD-së në Elbasan gati për referendum

Berisha fton demokratët të votojnë në Referendum: Merrni pjesë në votim

FOTO/ Kuvendi i 18 dhjetorit, përgatitjet e fundit në pallatin e Kongreseve

Spaho nxjerr SMS: Na gjen njerëz për Bashën? S’ka rëndësi a janë të PD

Nesër referendumi kundër Bashës! Berisha ‘provokon’, voton pranë ambasadës amerikane

Berisha: Dega e Njësisë Nr. 8 gati për referendumin historik të anëtarësisë së PD

Referendumi/ PD e Gjirokastrës dhe Lazaratit bëhen gati: Ditë e madhe nesër

Referendumi për shkarkimin e Bashës! Thirrja e Shehajt: Votoni në njësinë 7 dhe 5

Zhvillimet në PD/ Ç’do ndodhë nesër? Masat e marra nga policia e shtetit