Sherri mes të miturve në Pogradec, 15-vjeçari rëndë, dërgohet në Tiranë për mjekim
POGRADEC- Një ngjarje e rëndë ka ndodhur mbrëmjen e së hënës në Pogradec, ku një 15-vjeçar plagosi me thikë bashkëmoshatarin e tij, i cili është sjellë me urgjencë në spital. Në njoftimin e Policisë së Shtetit bëhet me dije se i plagosuri është transportuar në spitalin e Traumës Tiranë, në gjendje të rëndë shëndetësore, ndërsa autori u arrestua në flagrancë për veprën penale “Plagosja e rëndë me dashje”.
Në cilësinë e provës materiale u gjet dhe sekuestrua mjeti prerës (thikë), por po hetohet edhe shkaku i sherrit.
NJOFTIMI:
Pogradec/Plagosi me mjet prerës (thikë) një bashkëmoshatarin e tij, vihet në pranga 15-vjeçari, autori i dyshuar i ngjarjes. Mbrëmjen e djeshme, në lagjen nr. 1, Pogradec, në ambientet e një lokali, një shtetas 15-vjeç, banues në fshatin Vërdovë, Pogradec, dyshohet se ka plagosur me mjet prerës (thikë) një bashkëmoshatarin e tij, i cili u transportua në spitalin e Traumës Tiranë, në gjendje të rëndë shëndetësore. Falë ndërhyrjes të shpejtë, shërbimet e Policisë, bënë të mundur kapjen dhe ndalimin autorit të dyshuar të plagosjes, ku në përfundim të veprimeve procedurale specialistët për Hetimin e Krimeve të Komisariatit të Policisë Pogradec arrestuan në flagrancë 15-vjeçarin për veprën penale “Plagosja e rëndë me dashje”. Në cilësinë e provës materiale u gjet dhe sekuestrua mjeti prerës (thikë). Materialet i kaluan Prokurorisë pranë Gjykatës së Shkallës së Parë Pogradec, për veprime të mëtejshme.