Bota

Hamasi hap derën për kompromis: Armët mund të “ngrihen” ose ruhen gjatë armëpushimit me Izraelin

Bassem Naim, një anëtar i byrosë politike të Hamasit, foli për Associated Press ndërsa të dy palët përgatiten të kalojnë në fazën e dytë dhe më të ndërlikuar të marrëveshjes.

7 Dhjetor 2025, 22:38 Nga M.L
Hamasi hap derën për kompromis: Armët mund të
Foto ilustruese

HAMAS- Hamasi është gati të diskutojë "ngrirjen ose ruajtjen" e arsenalit të tij si pjesë e një armëpushimi me Izraelin, tha të dielën një zyrtar i lartë i Hamasit, duke sugjeruar një zgjidhje të mundshme për një nga çështjet më të vështira në marrëveshjen e ndërmjetësuar nga SHBA-të.

Bassem Naim, një anëtar i byrosë politike të Hamasit, foli për Associated Press ndërsa të dy palët përgatiten të kalojnë në fazën e dytë dhe më të ndërlikuar të marrëveshjes.

“Ne jemi të hapur për një qasje gjithëpërfshirëse në mënyrë që të shmangim përshkallëzimet e mëtejshme ose për të shmangur përplasjet ose shpërthimet e mëtejshme”, tha Naim nga kryeqyteti i Katarit, Doha, ku bazohet pjesa më e madhe e lidershipit të organizatës.

Kërkesa e Izraelit që Hamasi të dorëzojë armët e tij - një kërkesë në të cilën Izraeli është i vendosur - duket të jetë veçanërisht e vështirë për t'u përmbushur. Zyrtarët izraelitë, vazhdon Associated Press, thonë se është një kërkesë kyçe që mund të pengojë progresin në fusha të tjera.

Naim tha se Hamasi ruan “të drejtën për rezistencë”, por shtoi se organizata është e gatshme të dorëzojë armët e saj si pjesë e një procesi që synon krijimin e një shteti palestinez. Ai nuk dha shumë detaje se si mund të funksionojë kjo, por sugjeroi një armëpushim afatgjatë prej pesë ose 10 vjetësh për të zhvilluar bisedime.

“Kjo kohë duhet të përdoret seriozisht dhe në mënyrë gjithëpërfshirëse”, tha ai, duke shtuar se Hamasi është “shumë i hapur” në lidhje me atë që do të bëjë me armët e tij.

“Mund të diskutojmë ‘ngrirjen’, ruajtjen ose depozitimin e armëve, me garancinë e palestinezëve se nuk do t’i përdorin ato fare gjatë këtij armëpushimi”, tha ai.

Është e paqartë nëse ky propozim do t’i plotësonte kërkesat e Izraelit për demilitarizim të plotë. I pyetur nëse sulmi i Hamasit më 7 tetor ishte një gabim, Naim e mbrojti atë si një "akt mbrojtjeje".

Faza e dytë e bisedimeve pritet të jetë edhe më e vështirë, pasi do të duhet të adresohen çështje të tilla si vendosja e një force ndërkombëtare sigurie, krijimi i një komiteti teknokratik palestinez në Gaza, tërheqja e trupave izraelite nga territori dhe çarmatimi i Hamasit. Një komitet ndërkombëtar, i kryesuar nga Donald Trump, do të mbikëqyrë zbatimin e marrëveshjes dhe rindërtimin e Gazës.

Në përgjithësi, plani 20-pikësh i rënë dakord nga të dyja palët "ka nevojë për shumë sqarime", tha Naim. Një nga çështjet më urgjente është forca ndërkombëtare e stabilizimit.

Disa vende kanë shprehur gatishmërinë e tyre për të kontribuar me trupa në forcë, por përbërja e saktë, struktura e komandës dhe përgjegjësitë e saj ende nuk janë përcaktuar.

Një pyetje kyçe është nëse forca do të marrë përsipër çështjen e çarmatimit. Naim tha se kjo do të ishte e papranueshme për Hamasin dhe se organizata pret që forca të monitorojë zbatimin e marrëveshjes.

bassem naim

Sondazh

Poll

MË SHUMË