Sport

Real Madridi mbështet Xabin: "Ai është shefi"

Klubi mban qëndrim kundër thashethemeve për pakënaqësi nga disa anëtarë të skuadrës.

26 Nëntor 2025, 11:00 Nga DOSJA

SPANJE - Real Madridi e ka të qartë se Xabi Alonso është lideri i projektit, mbi lojtarët, sado të rëndësishëm që mund të jenë ata për klubin, si në fushë ashtu edhe jashtë saj.

Angazhimi ndaj trajnerit bask mbetet i fortë, pavarësisht rezultateve të dobëta të tre ndeshjeve të fundit, të cilat kanë rrezikuar epërsinë e ekipit në ligë (tani avantazhi, i cili dikur arrinte në pesë pikë, është vetëm një) dhe rezultoi në humbjen e parë të të bardhëve në fushatën e tyre evropiane.

Xabi Alonso: "Në këtë ekip, të gjithë jemi në të njëjtën situatë"

Te Valdebebas, nuk ka dyshim se Xabi Alonso, një trajner tek i cili ata investuan shumë verën e kaluar, është profesionisti ideal për të udhëhequr skuadrën. Në këtë drejtim, rezultatet flasin vetë.

Pavarësisht pengesave dhe dyshimeve të fundit, skuadra është në një pozicion për të konkurruar për dy titujt që aktualisht janë në garë: La Liga dhe Liga e Kampionëve, me Superkupën e Spanjës dhe Kupën e Mbretit që do të luhen në vitin 2026.

Real Madridi këmbëngul se "trajneri është shefi " dhe në këtë kuptim, mbështet të gjitha vendimet e trajnerit, përfshirë ato kontraverse, siç është lënia në stol e Vinicius (katër herë deri më tani këtë sezon) ose eksperimentimi me formacione të ndryshme taktike, si mbrojtja me pesë lojtarë e përdorur në ndeshjen e fundit të ekipit të dielën e kaluar në Elche.

Në këtë drejtim, klubi ka besim të plotë në aftësitë e trajnerit bask, të mbështetura nga karriera e tij e shkurtër, por e suksesshme si trajner, që kulmoi me titujt e fituar në Gjermani me Bayer Leverkusen.

Tekniku ideal

Klubi e konsideron turbulencën që rrjedh nga dështimet e fundit të ekipit, veçanërisht në dy ndeshjet e ligës kundër Rayo Vallecano dhe Elche, si disi normale, por nuk ka dyshime për përshtatshmërinë e Alonsos, duke pasur parasysh se ai nënshkroi një kontratë tre-vjeçare.

Pikëpamja mbizotëruese mbetet se trajneri spanjol është profili më i përshtatshëm për të udhëhequr epokën e re pas largimit të Carlo Ancelottit, trajnerit më të suksesshëm në historinë e klubit. Klubi beson se ky vendim është vërtetuar nga rezultatet deri më tani.

B.T (Dosja.al)