Bota

SHBA kundër karteleve të drogës/ Dërgon luftanije dhe nëndetëse bërthamore në Karaibe, paralajmërim i ashpër për trafikantët edhe nga Hegseth

Uashingtoni kohët e fundit ka vendosur të paktën shtatë anije luftarake në Karaibe, në atë që Trump e quan një operacion kundër trafikut ndërkombëtar të drogës, ndërsa akuzon Presidentin Venezuelan Nicolas Maduro dhe anëtarët e qeverisë së tij për drejtimin e një karteli droge.

3 Shtator 2025, 15:39 Nga E. D
SHBA kundër karteleve të drogës/ Dërgon luftanije dhe
 Pete Hegseth

SHBA- Sekretari i Mbrojtjes i SHBA-së, Pete Hegseth, paralajmëroi se operacionet ushtarake kundër trafikantëve të drogës nuk do të ndalen me sulmin e nisur dje kundër një anijeje nga Venezuela. Forcat e armatosura amerikane goditën një anije trafikimi droge që ishte nisur nga Venezuela, duke vrarë 11 narko-terroristë, njoftoi të martën Presidenti i SHBA-së, Donald Trump.

"Ne kemi operacione ajrore, nënujore dhe me bazë anijesh në vend sepse ky është një mision shumë serioz për ne dhe nuk do të ndalet vetëm me këtë sulm. Kushdo tjetër që trafikon në këto ujëra dhe që ne e dimë se është një narko-terrorist i përcaktuar do të përballet me të njëjtat pasoja", tha Hegseth për Fox News.

Uashingtoni kohët e fundit ka vendosur të paktën shtatë anije luftarake në Karaibe, në atë që Trump e quan një operacion kundër trafikut ndërkombëtar të drogës, ndërsa akuzon Presidentin Venezuelan Nicolas Maduro dhe anëtarët e qeverisë së tij për drejtimin e një karteli droge. Nga ana e tij, Sekretari i Shtetit i SHBA-së Marco Rubio tha në një deklaratë se operacioni u krye në Karaibe jugore dhe shënjestroi një anije që ishte nisur nga Venezuela.

Tensionet midis Uashingtonit dhe Karakasit vazhdojnë të përshkallëzohen, pasi, sipas raportimeve të shtypit, SHBA-të kanë dërguar një flotë anijesh luftarake në Karaibe, pranë brigjeve të Venezuelës, në atë që e përshkruan si një operacion për të kapur drogën që trafikohet përmes vendit të Amerikës Latine, disa javë pasi rriti në 50 milionë dollarë shpërblimin që ofron për kapjen e Presidentit Maduro, të cilin e quan një udhëheqës karteli në arrati.

"Shtatë anije luftarake amerikane, përfshirë tre anije zbarkimi, po lundrojnë drejt Karaibeve dhe një tjetër është në Paqësor si pjesë e operacionit," tha një zyrtar tjetër i Departamentit të Mbrojtjes të SHBA-së.

Tetë anije luftarake me 1,200 raketa dhe një nëndetëse bërthamore kanë synuar Venezuelën. Presidenti Maduro e sheh vendosjen e forcave të armatosura amerikane në Karaibe si kërcënimin më të madh ekzistencial me të cilin është përballur Venezuela në shekullin e kaluar dhe paralajmëron se nëse ushtria e Uashingtonit përpiqet të ndryshojë regjimin, vendi do të rezistojë.

"Tetë anije luftarake me 1,200 raketa dhe një nëndetëse bërthamore kanë synuar Venezuelën", u tha ai gazetarëve të huaj në Karakas të hënën, duke e quajtur kërcënimin "të pajustifikuar, imoral dhe plotësisht të paligjshëm".

 pete hegseth

Sondazh

Poll

MË SHUMË