Sport

Ndryshime në Kombëtaren kuqezi: largohen A. Bajrami, Ramadani e Muçi, ftohen të rinjtë Kacurri, Çokaj & Shpendi...

Ftohen tre futbollistë të rinj në grumbullimin e Kombëtares, dy prej të cilëve për here të pare dhe vinë nga ekipi U-21…

1 Shtator 2025, 16:47 Nga DOSJA
Ndryshime në Kombëtaren kuqezi: largohen A. Bajrami, Ramadani e

TIRANE - Ndryshime në listën e Kombëtares para ndeshjeve të shtatorit, në miqësoren me Gjibraltarin dhe kualifikuesen për Kupën e Botës 2026 me Letoninë.

Departamenti i Komunikimit në FSHF bën me dije, se mbrojtësi Adrian Bajrami nuk do të jetë pjesë e Kombëtares kuqezi. Ai ka vendosur të largohet nga Shqipëria për të luajtur me Zvicrën.

Pasi është vënë në dijeni për këtë vendim të lojtarit, trajneri Sylvinho ka vendosur të ftojë mbrojtësin Maldin Kacurri, i cili do të bashkohet me skuadrën në kampin stërvitor të kuqezinjve në Malaga gjatë të hënës dhe do të vihet në dispozicion për këto dy ndeshje. Kacurri, i cili ka qenë më parë pjesë e ekipeve kombëtare të moshave U-17, U-19 dhe U-21 të Shqipërisë, ftohet për herë të parë në Kombëtaren A.

Në vend të Ylber Ramadanit, i cili nuk do të jetë pjesë e Kombëtares për një problem shëndetësor, është thirrur Enis Çokaj, mesfushor i Levadiakosit në kampionatin grek, që ka qenë edhe më parë pjesë e Kombëtares A, ku numëron 5 ndeshje.

Pjesë e Kombëtares për dy ndeshjet e shtatorit nuk do të jetë as Ernest Muçi, i cili ka vuajtur nga dhimbje të mesit me shenja të inflamacionit të diskut. Pas konsultimit me stafin mjekësor të klubit dhe doktorin e Kombëtares, është vendosur që ai të mos thirret për këto ndeshje.

Trajneri Sylvinho ka vendosur të thërrasë sulmuesin Kristian Shpendi, i cili grumbullohet për herë të parë me Kombëtaren A, pas aktivizimeve me ekipet kombëtare të moshave U-19 dhe U-21.

B.T (Dosja.al)

Sondazh

Poll