Bota

Izraeli dëshiron lirimin e të gjithë pengjeve: Nuk do të lëmë askënd pas

Pas 22 muajsh lufte, Hamasi njoftoi të hënën se kishte pranuar propozimin për një armëpushim 60-ditor të shoqëruar me lirimin e pengjeve në dy faza.

19 Gusht 2025, 20:47 Nga E. D
Izraeli dëshiron lirimin e të gjithë pengjeve: Nuk do të
foto ilustruese

IZRAEL- Izraeli ende kërkon lirimin e të gjithë pengjeve të mbajtura në Gaza, tha sot një burim qeveritar për AFP-në, duke komentuar propozimin e ri të ndërmjetësve për një armëpushim në enklavën palestineze, i cili parashikon kthimin e këtyre njerëzve në dy faza. Pas 22 muajsh lufte, Hamasi njoftoi të hënën se kishte pranuar propozimin për një armëpushim 60-ditor të shoqëruar me lirimin e pengjeve në dy faza.

Izraeli nuk e ka ndryshuar politikën e tij dhe vazhdon të kërkojë lirimin e të gjithë pengjeve në përputhje me parimet e përcaktuara nga kabineti për t’i dhënë fund luftës. Ne jemi në fazën përfundimtare dhe vendimtare kundër Hamasit dhe nuk do të lëmë asnjë peng pas”, tha burimi qeveritar. 

Izraeli ende nuk i është përgjigjur zyrtarisht propozimit të paraqitur nga vendet ndërmjetëse si Egjipti, Katari dhe Shtetet e Bashkuara. Duke përshëndetur përgjigjen shumë pozitive të Hamasit, Katari theksoi më parë se propozimi pothuajse plotësisht e përsërit planin e SHBA-së të pranuar më parë nga Izraeli. Ky plan bazohet në një plan të mëparshëm nga i dërguari special i SHBA-së, Steve Witkoff, i cili kërkonte lirimin e dhjetë pengjeve të gjalla dhe dorëzimin e 18 trupave në këmbim të një armëpushimi 60-ditor dhe fillimit të negociatave për t'i dhënë fund luftës, raportoi radioja publike Kan. 

"Hamasi dhe fraksionet (e tjera) shpresojnë (...) që Netanyahu të mos vërë pengesa në zbatimin e marrëveshjes," tha për AFP-në një anëtar i byrosë politike palestineze, Izzat al-Rishk. 

Zëdhënësja e Shtëpisë së Bardhë, Caroline Levitt, tha të hënën se Uashingtoni po diskutonte propozimin.

"Nuk mendoj se është rastësi që Hamasi e pranoi këtë propozim pasi presidenti (Donald Trump) bëri një postim shumë të fortë në lidhje me këtë luftë në Truth Social dje", tha Levitt gjatë një konference informuese me gazetarët. 

Ministrat izraelitë të ekstremit të djathtë, siç është Ministri i Sigurisë Kombëtare, Itamar Ben-Gvir, po e paralajmërojnë Netanyahun të mos tërhiqet dhe besojnë se ai nuk ka mandatin për të bërë një marrëveshje të pjesshme. Pavarësisht përpjekjeve të ndërmjetësve, të dyja palët deri më tani nuk kanë arritur një marrëveshje për t'i dhënë fund luftës në Rripin e Gazës, e cila filloi pas sulmit të paprecedentë të Hamasit në territorin izraelit më 7 tetor 2023. Nga 251 pengjet e marra atë ditë, 49 ende mbeten në Gaza, por 27 prej tyre besohet të jenë të vdekur. Sulmet ndaj Gazës vazhdojnë.

izraeli

Sondazh

Poll

MË SHUMË