Bota

"Synoni për gjëra të mëdha"/ Papa Leoni: Ne qëndrojmë me të rinjtë e Gazës dhe Ukrainës

Në takimin e sotëm me besimtarët, përveç Papës, morën pjesë 20 kardinalë, 450 peshkopë dhe 7,000 priftërinj katolikë.

3 Gusht 2025, 15:13 Nga E. D
"Synoni për gjëra të mëdha"/ Papa Leoni: Ne
Papa Leoni XIV

ITALI- Papa Leoni XIV mbajti sot një meshë në një ambient të hapur jashtë qendrës së kryeqytetit italian, në të cilën morën pjesë më shumë se një milion të rinj katolikë nga e gjithë bota. Në takimin e sotëm me besimtarët, përveç Papës, morën pjesë 20 kardinalë, 450 peshkopë dhe 7,000 priftërinj katolikë.

"Synoni gjithmonë për gjëra të mëdha, synoni për shenjtëri, kudo që të jeni. Anët tona të cenueshme janë pjesë e ekzistencës dhe entitetit tonë të mrekullueshëm", shtoi Papa, duke u bërë thirrje të rinjve të mos kërkojnë një përsosmëri joekzistente, si dhe të rreme.

Shërbesa e sotme ishte tubimi më i madh masiv i besimtarëve që kryeqyteti italian ka pritur në njëzet e pesë vitet e fundit dhe u organizua si pjesë e Vitit të Shenjtë të Katolikëve.

Duke iu referuar një mesazhi nga paraardhësi i tij, i ndjeri Papa Françesku, Papa Leoni, duke iu drejtuar të rinjve që u mblodhën në Romë, theksoi se "të gjithë ne jemi të thirrur të përballemi me pyetje të mëdha, të cilat nuk ofrojnë ndonjë përgjigje të menjëhershme dhe të thjeshtë, por na ndihmojnë të fillojmë të ecim, të tejkalojmë veten, të kapërcejmë kufijtë që kishim njohur. Me një ngritje, pa të cilën nuk do të mund të fluturonim kurrë".

Në fund të meshës, Papa Leoni XIV iu referua luftërave në Gaza dhe Ukrainë, duke u bërë thirrje të rinjve të ndihmojnë në ndërtimin e një bote më të mirë.

“Ne qëndrojmë me të rinjtë e Gazës, me të rinjtë e Ukrainës. Vëllezër dhe motra, ju jeni një shenjë se një botë tjetër është e mundur. Një botë vëllazërie dhe miqësie, ku konfliktet nuk zgjidhen me armë, por me dialog. Ne vërtet duam të përhapim shpresë dhe dashuri”, tha Papa.

papa leoni xiv

Sondazh

Poll

MË SHUMË