Bota

SHBA i dërgon Iranit një propozim për marrëveshje bërthamore, Shtëpia e Bardhë: Është në interesin më të mirë të tyre që ta pranojnë

Raportimet për këtë propozim vijnë pas një raporti të Kombeve të Bashkuara që tha se Republika Islamike ka rritur prodhimin e pasurimit të uraniumit në nivele të larta.

1 Qershor 2025, 12:31 Nga M.B
SHBA i dërgon Iranit një propozim për marrëveshje
Shtëpia e Bardhë

SHBA- Shtetet e Bashkuara i kanë dërguar Iranit një propozim për marrëveshje bërthamore, që Shtëpia e Bardhë tha se është “e pranueshme” dhe është “në interesin më të mirë” të Teheranit që ta pranojë, raportuan mediat amerikane më 1 qershor. Raportimet për këtë propozim vijnë pas një raporti të Kombeve të Bashkuara që tha se Republika Islamike ka rritur prodhimin e pasurimit të uraniumit në nivele të larta.

Ministri i Jashtëm iranian, Abbas Araghchi, tha se atij i janë paraqitur “elemente të një propozimi të SHBA-së” nga homologu i tij nga Omani gjatë vizitës së tij në Teheran të shtunën.

“I dërguari [i SHBA-së, Steve] Witkoff ka dërguar një propozim të detajuar dhe të pranueshëm te regjimi iranian dhe është në interesin më të mirë të tyre që ta pranojnë”, tha zëdhënësja e Shtëpisë së Bardhë, Karoline Leavitt, raportoi New York Times.

Propozimi është përshkruar si një seri pikash kyç, e jo si një draft i plotë, sipas New York Times, që ka cituar zyrtarë që kanë njohur me këtë këmbim diplomatik. Propozimi i bën thirrje Iranit që të ndalë të gjithë pasurimin e uraniumit dhe propozon krijimin e një grupi rajonal për të prodhuar energji bërthamore, grup që përfshin Iranin, Arabinë Saudite dhe shtete të tjera arabe, si dhe SHBA-në.

Irani ka mbajtur pesë runde bisedimesh me SHBA-në në kërkim të një marrëveshjeje të re që do të zëvendësonte marrëveshjen me fuqitë bërthamore, nga e cila presidenti amerikan, Donald Trump, u tërhoq gjatë mandatit të tij të parë presidencial më 2018. Araghchi tha të shtunën se Irani i konsideron armët bërthamore “të papranueshme”. Këto deklarata ai i bëri një ditë pasi Trumpi tha se Irani “nuk mund të ketë armë bërthamore”, teksa u shpreh që shpreson që së shpejti të arrihet një marrëveshje./ REL

shba

Sondazh

Poll

MË SHUMË