Sport

FIFA hedh si “karrem” biletat: Botërori për klube 2025, “bonus” për Botërorin 2026...

Me 'paketat' e biletave për eventin e qershorit, tifozët sigurojnë akses në Kupën e Botës 2026, e organizuar gjithashtu në SHBA

6 Prill 2025, 16:30 Nga DOSJA

FIFA hedh si “karrem” biletat: Botërori për klube 2025,

ZVICER - FIFA ka njoftuar një ofertë "novatore" për Kupën e Botës për Klube 2025, e cila do të ketë premierë në verën e SHBA-së, duke kombinuar "paketat" e biletave me aksesin "e garantuar" në Kupën e Botës 2026 - eventi më i madh i futbollit, i cili gjithashtu do të organizohet në SHBA një vit më vonë.

Me këtë lëvizje, FIFA po tenton të “shesë” turneun e ri, i cili ende po mundohet të gjejë vendin e tij në kalendarin e futbollit. Sipas asaj që është bërë e ditur, dy pako biletash do të dalin për Botërorin e Klubeve:

Paketa standarde: Përfshin biletat për 2-3 ndeshje të Kupës së Botës për Klube 2025. Ata që i blejnë dhe i përdorin (pa rishitje) do të kenë një "opsion të garantuar" për të blerë një biletë për një ndeshje të Kupës së Botës 2026 në SHBA (me përjashtim të finales). FIFA, megjithatë, rezervon të drejtën të vendosë, sipas “diskrecionit të saj absolut”, se cilën ndeshje dhe çfarë lloj bilete do të marrë tifozi.

Super paketa e biletave: Përfshin një biletë për 20 ndeshje në 2025, me kusht që të jenë të pranishëm të gjitha (në 20 ditë të ndryshme nga 22 të turneut). Blerësit fitojnë të drejtën për të blerë një biletë për finalen e Kupës së Botës 2026. Përndryshe, ata mund të ndajnë biletat me 'të njohurit' (me një marrëdhënie të provuar), por e drejta për vitin 2026 mbetet e tillë.

Çmimet: Të larta për vitin 2025, të panjohura për vitin 2026

Çmimet për Kupën e Botës 2026 mbeten një mister, me biletat që do të dalin në shitje në vjeshtë. Në të kundërt, për vitin 2025 çmimet dihen dhe fiksohen që në dhjetor, nëpërmjet Ticketmaster dhe ofertës së FIFA-s: "Kategoria 1" (tribunat më të ulëta) kushton nga 100 dollarë në mbi 200 dollarë në fazën e grupeve dhe 2.600 dollarë për finalen.

"Kategoria 2" (trupi i sipërm) varion nga 60 deri në 140 dollarë në grupe. Bileta më të lira iu dhanë tifozëve të skuadrave, por çmimet konsiderohen të larta sipas standardeve evropiane, duke shkaktuar ankesa.

Infantino “shet” vizionin

Me ndeshjen hapëse ndërmjet Inter Miami dhe Al Ahly në stadiumin Hard Rock të Floridës dy muaj larg, shumë bileta mbeten të pashitura. Presidenti i FIFA-s, Gianni Infantino, ka organizuar aktivitete promovuese me yje dhe të famshëm, duke shkuar deri në Shtëpinë e Bardhë, ku la trofeun e turneut në Zyrën Ovale pranë Donald Trump.

Në deklaratat e tij ai e krahasoi atë me Botërorin “e madh”, ndërsa Instagrami i tij po “vërshon” me postime që e cilësojnë si “turnirin më elitar të klubeve në histori”.

B.T (Dosja.al)

Sondazh

Poll

MË SHUMË