Sport

Drejtuesit e Fenerbahçes mbështesin José Mourinhon pas polemikave me Galatën…

Në vazhdën e polemikave të shkaktuara nga komentet e José Mourinhos pas ndeshjes kundër Galatasaray, drejtorët e Fenerbahçes i erdhën në ndihmë trajnerit të tyre në një deklaratë të publikuar të martën. Ata denoncuan një fjali "të marrë qëllimisht jashtë kontekstit dhe të shtrembëruar në mënyrë mashtruese".

25 Shkurt 2025, 22:27 Nga DOSJA
Drejtuesit e Fenerbahçes mbështesin José Mourinhon pas

TURQI - Ndërkohë që dihet se derbi mes Galatasarayt dhe Fenerbahçes është një nga më të nxehtit në botën e futbollit, ai i së hënës, më 24 shkurt, ishte padyshim pak më i nxehtë se zakonisht.

“Faji” qëndron në një të kaluar të rëndë mes dy skuadrave, përkatësisht të para dhe të dyta në Super Lig, rreth arbitrimit. Në këtë kontekst, ishte arbitri slloven që u zgjodh për të qetësuar debatin: Slavko Vinçiç me përvojë, me tetë ndeshje në Champions League këtë sezon.

Një emërim që José Mourinho nuk mungoi ta përgëzojë në konferencën për shtyp pas ndeshjes, edhe nëse skuadra e tij nuk mund të bënte më mirë se një barazim dhe mbetet gjashtë pikë prapa rivalëve të mbrëmjes: 

“Pas ndeshjes, e falënderova Slavko Vincicin që ka arbitruar këtë ndeshje të madhe. Nëse do të kishte qenë një arbitr turk, do të ishte një fatkeqësi e plotë. (...) Pankina e Galatasaray po kërcente si majmunët pas çdo vendimi të mirë”,- tha ai.

Kjo fjali e fundit shkaktoi zemërimin e drejtuesve të “Cimbom”, të cilët në një deklaratë për shtyp të shoqëruar me sloganin “Thuaj jo racizmit” njoftuan synimin e tyre për të bërë një ankesë në prokurori, UEFA dhe FIFA për komentet e cilësuara si “raciste”.

Nga ana e tij, trajneri i Galatës, Okan Buruk, ka preferuar të ngacmojë homologun e tij: “Pas ndeshjes i thashë se kishte bërë më keq se gjyqtarët turq. Mourinhos iu desh shumë kohë për të qarë! E qara... Ai është i famshëm për të qarat e tij. Madje ka shkuar të qajë në dhomën e arbitrave! Lëreni të vazhdojë të qajë!”

Këtë të martë, në një deklaratë të publikuar në rrjetet e saj sociale, Fener mbrojti trajnerin e saj portugez, duke e gjykuar deklaratën "të marrë qëllimisht jashtë kontekstit dhe të shtrembëruar në mënyrë mashtruese", ndërsa njoftoi ushtrimin e "të drejtave të tyre ligjore".

Deklarata e plotë për shtyp

“Ne e konsiderojmë të nevojshme ta lëshojmë këtë deklaratë në lidhje me një çështje që dominoi në rendin e ditës pas ndeshjes mes ekipit tonë të futbollit dhe Galatasaray. Një vërejtje pas ndeshjes e bërë nga trajneri ynë, Jose Mourinho, u hoq qëllimisht nga konteksti dhe u shtrembërua në mënyrë mashtruese.

Siç mund ta shohë çdo njeri i arsyeshëm, shprehja e përdorur nga Jose Mourinho kishte për qëllim vetëm të përshkruante reagimin e tepruar të stafit teknik të ekipit kundërshtar ndaj vendimeve të arbitrit gjatë ndeshjes.

Këto komente në asnjë mënyrë nuk mund të barazohen me racizëm. Çdo përpjekje për ta portretizuar këtë deklaratë si një vërejtje raciste është krejtësisht dashakeqe. Njoftojmë publikun se do të ushtrojmë të drejtat tona ligjore ndaj kësaj akuze të pabazë, e cila synon të largojë konkurrencën jashtë fushës, të ndryshojë axhendën dhe të manipulojë perceptimin publik”.

B.T (Dosja.al)

Sondazh

Poll

MË SHUMË