Aktualitet

U kap me 3 kg kokainë në Itali, arrestohet 33-vjeçari shqiptar, e pëson edhe një shok i tij, i sekuestrohen 48 mijë euro cash

Kontrolle të tjera janë kryer edhe në persona që kanë pasur kontakte të shpeshta me të arrestuarin. Gjatë këtyre operacioneve, 48 mijë euro cash u gjetën në shtëpinë e një shqiptari, po ashtu 33 vjeç, të fshehura në një çantë shpine brenda një gardërobë.

5 Tetor 2024, 18:25 Nga N.F

 

U kap me 3 kg kokainë në Itali, arrestohet 33-vjeçari shqiptar,
Policia italiane

 

ITALI- Autoritetet italiane kanë vënë në pranga një shqiptar pasi u kap në një qendër të një rrjeti të trafikut të drogës në provincën Latina në Itali. 33-vjeçari shqiptar u kap teksa kishte në posedim 3 kilogramë kokainë, e karakterizuar nga një markë luksoze.

Hetimi nisi nga raportimet për një aktivitet të pazakontë në një magazinë të braktisur në zonën e Sabaudia, ku ishin vërejtur disa lëvizje të çuditshme. Hetuesit e filluan një seri aksionesh, duke vënë re një individ i cili, në disa raste, hynte dhe dilte me shpejtësi nga struktura dhe më pas kthehej në shtëpinë e tij, që ndodhej aty pranë.

Në bazë të këtyre vëzhgimeve, autoritetet vendosën të ndërhynin. Efektivët, pasi kanë vëzhguar shtëpinë, kanë ndaluar të dyshuarin, shtetas shqiptar 33 vjeç, i njohur tashmë në polici për trafik droge. Gjatë kontrollit në banesë, efektivët gjetën një sasi kokaine, si dhe materiale për paketimin dhe peshimin e lëndës. Më pas, kontrolli në magazinë çoi në zbulimin e dy blloqeve të tjera me nga një kilogram kokainë, të dyja të shënuara me logon e një marke të njohur orëve luksoze.

Hetimet nuk u ndalën me kaq. Kontrolle të tjera janë kryer edhe në persona që kanë pasur kontakte të shpeshta me të arrestuarin. Gjatë këtyre operacioneve, 48 mijë euro cash u gjetën në shtëpinë e një shqiptari, po ashtu 33 vjeç, të fshehura në një çantë shpine brenda një gardërobë. Mungesa e provave që justifikonin një burim të ligjshëm të ardhurash bëri që autoritetet të sekuestronin shumën, me qëllim që të kuptonin nëse paratë mund të lidheshin me aktivitetet e paligjshme të të arrestuarit.

Pas përfundimit të operacionit, shtetasi shqiptar u dërgua në burgun Latina, ku do të qëndrojë nën kujdesin e policisë, në pritje të vendimeve të Autoritetit Gjyqësor. Vlen të theksohet se procedimi aktualisht është në fazën paraprake, ndaj i dyshuari konsiderohet i pafajshëm deri në vërtetimin e fajësisë.

policia italiane shqiptar droge

Sondazh

Poll

MË SHUMË