Art&Argëtim

Çfarë ndodh me monedhat që hidhen në shatërvanin e Fontana di Trevi në Romë?

Këto monedha, të cilat përcjellin dëshira për dashuri, shëndet të mirë ose kthim në Qytetin e Përjetshëm, u japin ndihmë të konsiderueshme njerëzve në nevojë.

10 Mars 2024, 11:25 Nga S.N

Çfarë ndodh me monedhat që hidhen në shatërvanin e

Foto Ilustrim

ITALI- Për qindra vite, vizitorët në Romë janë dyndur në Shatërvanin e Trevit për të shprehur një dëshirë, duke hedhur monedha me dorën e djathtë, në ujin e shatërvanit. Këto monedha, të cilat përcjellin dëshira për dashuri, shëndet të mirë ose kthim në Qytetin e Përjetshëm, u japin ndihmë të konsiderueshme njerëzve në nevojë.

Monedhat grumbullohen për disa ditë dhe më pas hiqen e dërgohen në degën e Romës të organizatës globale të bamirësisë katolike Caritas, e cila i përdor ato për të financuar një bankë ushqimore, një kuzhinë sociale dhe programe të tjera të mirëqenies.

Në vitin 2022 Caritas mblodhi 1.4 milionë euro nga shatërvani dhe pret të ketë mbledhur edhe më shumë në vitin 2023. Roma është një nga qytetet më të vizituara në botë me 21 milionë turistë në vit.

Nxjerrja e monedhave është një spektakël më vete dhe përfshin punëtorë nga Ndërmarrja Komunale e Energjisë Elektrike dhe Ujësjellës (ACEA) që balancojnë në buzë të shatërvanit të madh barok, duke përdorur fshesa të gjata dhe tuba thithës.

Dy herë në javë, deri në katër punëtorë mbledhin monedhat, tha për Reuters drejtori i ACEA Francesco Prisco. Shatërvani zbrazet për pastrim dy herë në muaj. "Operacionet e grumbullimit dhe pastrimit po kryhen sa më shpejt që të jetë e mundur në përpjekje për të minimizuar kohën e ndërprerjes së shatërvanit," thotë ai.

Pasi monedhat mblidhen në një rresht të gjatë me fshesa të gjata, ato pastrohen me fshesë me korrent dhe dërgohen në zyrën e Caritas-it, ku punonjësi Fabrizio Marchioni i shtrin në një tavolinë të madhe tharjeje. Më pas monedhat ndahen, renditen dhe numërohen. Shatërvani i Trevit, i përfunduar në 1762 , mbulon njërën anë të Palazzo Polit në Romën qendrore, me statujat e Tritonit dhe kuajt që tërheqin qerren e perëndisë Oqeani, duke zbutur ujërat.

Është vendi ku regjisori Federico Fellini vendosi një nga skenat më të famshme të kinemasë në La Dolce Vita , me Anita Ekberg që hyn në shatërvan pas mesnate dhe i bën shenjë Marcello Mastroianni-t ta ndjekë atë.

Sigurisht, sot hyrja në shatërvan është rreptësisht e ndaluar dhe turistët përballen me gjoba nëse e bëjnë këtë. Siç është e ndaluar edhe vjedhja e monedhave, të cilat disa e kanë tentuar edhe me magnet të ngjitur në shtylla.