Politike

“Kërcënim serioz për sigurinë e Kosovës”/ Berisha DENONCON: Drejtuesja e SHISH ka vizituar Serbinë në mënyrë të fshehtë

Sipas kryedemokratit, vizita e saj dëshmon se ajo u emërua në atë post si një urë lidhëse konfidenciale midis Ramës dhe presidentit serb Vuçiç, në bashkërendimin e veprimtarive të tyre kundër Kosovës dhe jo vetëm

31 Maj 2023, 10:40 Nga m.s
“Kërcënim serioz për sigurinë e Kosovës”/
Sali Berisha

TIRANE- Kreu i Partisë Demokratike Sali Berisha ka bërë një denoncim të fortë, ku shprehet se kryetarja e Shërbimit Inteligjent të Shqiperisë (SHISH) Vlora Hyseni, e ka nisur punën e saj me një vizitë sekrete në Beograd.

Sipas kryedemokratit, vizita e saj dëshmon se ajo u emërua në atë post si një urë lidhëse konfidenciale midis kryeministrit Edi Rama dhe presidentit serb Aleksandër Vuçiç, në bashkërendimin e veprimtarive të tyre kundër Kosovës dhe jo vetëm.

Berisha shkon edhe më tej duke thënë se vizita në fjalë vjen në kulmin e krizës së marrëdhënieve Kosovë-Serbi, e cila reflekton për një bashkërendim të përpjekjeve të Ramës dhe Vuçiç kundër Kosovës.

POSTIMI I PLOTË:

“Miq, mediat informojnë se Vlora Hyseni, drejtore e Shërbimit Inteligjent të Shqiperisë nisi punën me vizitën e saj të parë sekrete në Beograd dhe ky lajm deri sot nuk është përgënjeshtruar nga SHISH. Kjo vizitë e saj në Beograd për kohën që zhvillohet, por dhe background-in e shkarkimit të saj nga autoritetet e Kosovës, dëshmon se ajo u emërua në atë post si një urë lidhëse konfidenciale midis Ramës dhe sivllaut të tij Vuçiç, në bashkërendimin e veprimtarive të tyre kundër Kosovës dhe jo vetëm.

Në këtë kontekst kjo vizitë në kulmin e krizës së marrëdhënieve Kosovë-Serbi flet për një bashkërendim të përpjekjeve të Ramës dhe padronit të tij kundër Kosovës, gjë që i intereson shumë ketij të fundit për shkak të krizës të rëndë politike të brendshme të Beogradit.

Por vizita e fshehtë e Vlora Hysenit në Beograd, po të kemi parasysh se ajo drejton Sherbimin Inteligjent të një vendi antarë të NATO-s është një ogur i keq për të gjithë informacionin e klasifikuar të NATO-s, i cili nëpërmjet konfidentes Hyseni mund të përfundojë në duart e padronit të Edi Ramës, Putinit të Vogël dhe nga ai, në duart e Putinit te Madh.

Kjo vizitë është një goditje e rëndë për bashkëpunimin tonë me shërbimet e vendeve mike të rajonit të cilat pas saj nuk do shkëmbejnë më informocione të ndjeshme me shërbimin shqiptar duke ditur se konfidentja e Ramës mund t’i dërgojë ato në Beograd.

Dënoj këtë vizitë si një kërcënim serioz për sigurinë e Kosovës, të Shqiperisë, rajonit dhe NATO-s dhe kërkoj largimin e saj të menjëhershëm nga detyra. #sb

sali berisha vuçiç vlora hyseni beograd

Sondazh

Poll

MË SHUMË