Aktualitet

VIDEO/ Aksioni në Vlorë, policia çmonton 16 kamera sigurie të vendosura nga grupet kriminale, policia: Monitoronin zonat më të frekuentuara

Nga policia e Vlorës nuk bëhet me dije nëse ka pasur persona të shoqëruar në lidhje me vendosjen e ketyre kamerave. 

26 Janar 2023, 18:04 Nga F.M
VIDEO/ Aksioni në Vlorë, policia çmonton 16 kamera sigurie
Vlorë

VLORË- Policia ka çmontuar 16 kamerat sigurie që ishin vendosur në pikat kyçe të qytetit bregdetar. Në njoftimin e policisë bëhet me dije se kamerat ishin të lidhura me aparate celulare të shtetasve të ndryshëm dhe ishin instaluar në lagjet “Uji i Ftohtë”, “1 Maji”, “24 Maji”, “Lirim” dhe “Hajro Çakërri”. Kamerat e sekuestruara ishin vendosur pa lejen përkatëse të organeve kompetente. Nga policia e Vlorës nuk bëhet me dije nëse ka pasur persona të shoqëruar në lidhje me vendosjen e ketyre kamerave. 

Aksioni në Vlorë vjen pas atij në Shkodër ku janë çmontuar mbi 40 kamera sigurie. Deri më tani kanë përfunduar në polici pesë persona që dyshohet se kishin lidhur kamerat dhe përmes tyre monitoronin veprimet e rivalëve dhe të policisë.

Njoftimi: 

Vijon faza e tretë e planit operacional policor të koduar “Fijet”. Plani operacional intensiv, i iniciuar nga Drejtoria e Përgjithshme e Policisë së Shtetit, në të gjitha qarqet e vendit. Finalizimi i fazës së tretë të operacionit “Fijet”, rezultoi me çmontimin e 16 kamerave që kontrolloheshin nga kontigjenti kriminal, me qëllim informimin. Kamerat ishin vendosur në zona me frekuentim të lartë, në qytet. Vijojnë hetimet në nivel qëndror dhe vendor, me qëllim identifikimin e shtetasve që i kontrollonin këto kamera, për qëllime kriminale. Strukturat hetimore të DVP Vlorë në bashkëpunim me Komisariatin e Policisë Vlorë, në zbatim të detyrave të përcaktuara në kuadër të planit operacional mbarëkombëtar të koduar “Fijet”, i iniciuar nga Drejtoria e Përgjithshme e Policisë së Shtetit, si dhe me mbështetjen e inteligjencës informative, për vendosjen e paautorizuar të disa kamerave, në disa lagje të qytetit të Vlorës, me qëllim sigurimin e informacioneve për qëllime kriminale, si dhe për të monitoruar lëvizjet e Policisë, kanë organizuar punën për evidentimin dhe çmontimin e këtyre kamerave, identifikimin e pronarëve të tyre, si dhe për dokumentimin e plotë ligjor të qëllimit të përdorimit. Shërbimet e Komisariatit të Policisë Vlorë kanë çmontuar dhe sekuestruar 16 kamera, të dyshuara të lidhura me aparate celulare të shtetasve të ndryshëm. Këto kamera ishin instaluar në lagjet “Uji i Ftohtë”, “1 Maji”, “24 Maji”, “Lirim” dhe “Hajro Çakërri”. Kamerat e sekuestruara ishin vendosur pa lejen përkatëse të organeve kompetente. Vendosja e tyre është në kundërshtim me ligjin 9887, të datës 10.03.2008 "Për mbrojtjen e të dhënave personale" dhe përbën veprën penale "Ndërhyrje të padrejta në jetën private", që parashikohet nga neni 121 i Kodit Penal. Në bashkëpunim me Prokurorinë pranë Gjykatës së Rrethit Gjyqësor Vlorë, vijon puna intensive për identifikimin e shtetasve që kanë instaluar këto kamera, si dhe për zbardhjen e plotë të qëllimit të vendosjes së tyre.

kamerat ne shkoder policia e vlore kamerat ne vlore

Sondazh

Poll

MË SHUMË