Editorial

Rama, shqiptari i vetëm që e sheh paqen tek influenca e Vuçiç

Kryeministri i Shqipërise ka shpresë se, nëse Vuçiç përdor influencën e tij, do të kthehet paqja me Veri.

11 Dhjetor 2022, 15:20 Nga Dosja.al

Rama, shqiptari i vetëm që e sheh paqen tek influenca e

Vuçiç, Rama dhe Kurti

Pas një heshtjeje të pashpjegueshme disaditore, Kryeministri i Shqipërisë vendosi të flasë më në fund për atë që po ndodh në Kosovë. Dhe nuk zhgënjeu. Ndërkohë që e gjithë Bota Perëndimore dhe çdo fëmijë në Kosovë e di se, pas sulmeve ndaj policisë së Kosovës, institucioneve të saj dhe Eulex-it mbrëmë, janë zarat e Beogradit, ndërkohe që influenca e Beogradit që nga 12 qershori 1999, vazhdon të kërcënoje paqen në Kosovë, Kryeministri i Shqipërise ka shpresë se, nëse Vuçiç përdor influencën e tij, do të kthehet paqja me Veri.

Ndërsa Albin Kurti dhe e gjithë klasa politike e Kosovës, në opozitë sot apo në pushtet dje, e thone publikisht atë qe të gjithe e dinë, se Vuçiç është pas rebelimit të armatosur të një grupi serbësh në Veri, se armatosja e Serbisë dhe Wagnerat ruse janë një projekt i përbashkët i dy vendeve sllave për ta ribërë luftën në Kosovë, Edi Rama është i vetmi shqiptar mbi tokë që paqjen e sheh tek influenca e Beogradit.

Rama, shqiptari i vetëm që e sheh paqen tek influenca e

Po të ishte person privat, kjo nuk do të thoshte asgjë, por si Kryeministër nuk mund të lejohet që një njeri i vetëm ta vendosë Shqipërinë në anën e Serbisë, kundër Kosovës, veçanërisht në këtë moment vendimtar. Ai nuk mund të përfaqësoje me qëndrimin zyrtar të Shqipërisë, ndërkohe që situata po vështirësohet dhe Kosovës i duhet patjetër një ndihmë në përballjen vendimtare me Serbinë nën trysninë e një marrëveshjeje brenda 6-mujorit të vitit të ardhshëm.

Kjo nuk është vetëm çështje e opozitës. Vetë Partia Socialiste duhet të zyrtarizojë qëndrimin e saj. Kjo mund të bëhet me një rezolutë në Kuvend që ta detyrojë qeverinë të mbajë qëndrimin për të cilin e detyron Kushtetuta, ose nëse vazhdon ta shkelë Kushtetutën, të gjejë një Kryeministër tjetër.

Vetëm 3 orë përpara se Kryëministri të deklaronte shpresën për paqe tek influenca e Beogradit, ish-Kryeministri socialist, Pandeli Majko, kishte postuar në Twitter një qëndrim të ashpër ndaj Beogradit, duke e akuzuar se kërkon ta shndërrojë Veriun e Kosovës në Donbas.

Qëndrimi i Majkos është i njëjtë me atë të klasës politike të Kosovës, pa përjashtim, që sheh tek influenca e Serbisë, jo vetëm një shkelje të rëndë se Sovranitetit të Kosovës, por edhe ëndrrën për një luftë tjetër me rezultat të kundërt nga 1999.

Shqipëria nuk e ka luksin të ketë një Kryeministër që ndjek politikë private kundër linjës kombëtare, nuk e ka luksin ta tregojë Serbinë si paqedashëse dhe konfliktin në Veri si një përplasje mes politikave të qeverisë dhe reagimit të minoritetit serb. Ky është një qëndrim i pavërtetë dhe antikombëtar.

Prandaj është e domosdoshme që klasa politikë shqiptare të detyrojë qeverinë që të ndryshojë qëndrim, ose të mbështesë një qeveri tjetër që i shërben interesit Kombëtar në këto momente vendimtare për Kosovën.