Aktualitet

"Djalin ma hodhën në kanal"/ 3 vite nga vrasja e Florian Selimajt, nëna: Shteti të na mbrojë, vrasësit janë rrugëve

Dukate Selimaj i bën apel shtetit shqiptar për ndihmë dhe organeve të drejtësisë të zbardhin të vërtetën dhe autorët të marrin dënimin e merituar.

14 Tetor 2022, 21:21 Nga A.B
"Djalin ma hodhën në kanal"/ 3 vite nga vrasja e Florian
Dukate Selimaj

FIER- Kur kanë kaluar 3 vite nga vrasja e 23-vjeçarit Florian Selimaj në fshatin Sulaj të Fierit, ende nuk është vendosur drejtësia për këtë ngjarje. Dukate Selimaj, nëna e Florian Selimajt endet nëpër organet e drejtësisë për të kërkuar drejtësi për djalin e saj. Ajo pretendon për 'News24' se nuk janë kryer veprimet e duhura nga organet hetimore për mbledhjen e provave. Nëna e Florian Selimajt pretendon se prokurori i parë që hetoi çështjen ka manipuluar provat. Sipas saj pas shkarkimit të prokurorit nga vettingu dhe zëvendësimit me një prokuror tjetër ngjarja është zbardhur.

Ajo i bën apel shtetit shqiptar për ndihmë dhe organeve të drejtësisë të zbardhin të vërtetën dhe autorët të marrin dënimin e merituar.

'Kam 3 vite që merrem me cështjen e djalit tim, po bëj përpjekje për të zbardhur çështjen, pasi Prokurori nuk më ka dhënë mundësinë që të njihem me asgjë. Relacioni i policisë që më ka ardhur te dosja është i pasaktë dhe i manipuluar. Unë kam qënë në vendngjarje, kam marrë informacion nga policia dhe është ndryshuar relacioni. Që kur kam marrë policinë në telefon e deri kur është gjetur trupi i djalit tim, kam kërkuar arsye se pse nuk po hetohej, trupin e djalit e ka gjetur burri im, në 6 e gjysëm të mëngjesit, ndërsa policia e shtetit rrinte. Para 1 muaji jam njohur me dosjen e plotë, e hapa vetë se kisha interes, kur kam konstatuar se prokurori i çështjes, kishte nxjerrë, dhe pse atë natë janë kapur në flagrancë autorët, ai e ka nxjerrë aktin e ekspertimit me gjak jo human. Akoma pa varrosur djalin tim, ai ka bërë aktin e ekspertimit. Nuk më është dashur shumë të shoh se ka manipulim. Prokurori u shkarkua nga vetingu, në mars të këtij viti cështjen e ka marrë një prokuror tjetër, e ka zbardhur për 3 muaj çështjen. Tani ka dalë me gjak human. Kemi të bëjmë me vrasje me dashje mirëpo është vrasje me paramendim. Unë i bëj shtetit apel që të na mbrojë ne, të na sigurohet jeta, nuk jetojmë më në fshat se nuk kemi më siguri.Se vrasësit i lënë rrugëve, nuk i kapin.'- është shprehur nëna e Florian Selimajt.

Në 12 Gusht të vitit 2019, 23-vjeçari Florian Selimaj u gjet i vrarë me thikë në një kanal, në vendin e quajtur “Kthesa e Hamilit”. Pas ngjarjes policia njoftoi se kishte arrestuar autorët dyshuar të krimit, por ende nuk ka një autor të dënuar.

florjan selimaj dukate selimaj

Sondazh

Poll

MË SHUMË