Bota

"Procesi i Paqes", Putin pritet të vizitojë Iranin për samit mbi Sirinë

Rusia, Turqia dhe Irani kanë zhvilluar vitet e fundit bisedime si pjesë e të ashtuquajturit "procesi i paqes në Astana" për t'i dhënë fund më shumë se 11 viteve të konfliktit në vendin e Lindjes së Mesme.

12 Korrik 2022, 22:27 Nga I.A

"Procesi i Paqes", Putin pritet të vizitojë Iranin

Vladimir Putin

IRAN- Ndërsa lufta e Rusisë ndaj Ukrainës po vazhdon, Presidenti Vladimir Putin do të udhëtojë në Iran javën e ardhshme për një samit për Sirinë me homologun e tij iranian Ebrahim Raisi dhe atë turk Rexhep Tajip Erdogan.

“Vizita e presidentit në Teheran është planifikuar për më 19 korrik”, tha të martën zëdhënësi i Kremlinit Dmitry Peskov. Ai shtoi se treshja do të takohet për bisedimet e paqes mbi Sirinë.

Aljazeera shkruan se Rusia, Turqia dhe Irani kanë zhvilluar vitet e fundit bisedime si pjesë e të ashtuquajturit "procesi i paqes në Astana" për t'i dhënë fund më shumë se 11 viteve të konfliktit në vendin e Lindjes së Mesme. Rusia dhe Irani janë mbështetësit kryesorë ushtarakë dhe politikë të presidentit sirian Bashar al-Assad, ndërsa Turqia ka ofruar ndihmë ushtarake për Ushtrinë e Lirë Siriane dhe grupe të tjera rebele që ende luftojnë kundër forcave të al-Asadit në veriperëndim.

Udhëtimi i huaj shënon të dytin për shefin e Kremlinit që kur dërgoi trupa në Ukrainë në fund të shkurtit; ai vizitoi Taxhikistanin në fund të qershorit. Rusia dhe Irani kanë lidhje të ngushta, ndërsa Turqia është përpjekur të veprojë si ndërmjetëse gjatë konfliktit në Ukrainë.

Njoftimi i së martës vjen pasi Shtëpia e Bardhë tha të hënën se besonte se Moska po i drejtohej Iranit për t'i siguruar atij "qindra" dronë, duke përfshirë ata të aftë për të mbajtur armë, për përdorim në Ukrainë. Këshilltari i Sigurisë Kombëtare i SHBA-së, Jake Sullivan tha se ishte e paqartë nëse Irani i kishte ofruar Rusisë ndonjë nga dronët, por tha se Uashingtoni ka "informacion" që tregon se Irani po përgatitet të trajnojë forcat ruse për t'i përdorur ato brenda këtij muaji.

"Informacionet tona tregojnë se qeveria iraniane po përgatitet t'i ofrojë Rusisë deri në disa qindra UAV, duke përfshirë UAV-të e aftë për armë në një afat kohor të përshpejtuar," u tha Sullivan gazetarëve, duke iu referuar dronëve me akronimin për mjetet ajrore pa pilot.

vladimir putin ebrahim raisi rexhep tajip erdogan