Bota

Rusia u bën thirrje luftëtarëve ukrainas në Severodonetsk: Dorëzohuni si shokët e juaj në Mariupol

Ministria tha se ishte e përgatitur të kryente një "operacion humanitar" të mërkurën për të evakuuar civilët nga uzina kimike Azot e kontrolluar nga ukrainas në territorin e kontrolluar nga Rusia në veri.

14 Qershor 2022, 16:29 Nga DOSJA
Rusia u bën thirrje luftëtarëve ukrainas në Severodonetsk:
Lufta ne Ukraine

UKRAINË- Ministria e Mbrojtjes e Rusisë u bëri thirrje të martën luftëtarëve ukrainas në Severodonetsk që të dorëzojnë armët siç ka ndodhur me shokët e tyre që më parë u dorëzuan në Mariupol.

“Ne u bëjmë thirrje autoriteteve zyrtare në Kiev të tregojnë maturi dhe të japin udhëzimet e duhura për militantët që të ndalojnë rezistencën e tyre të pakuptimtë dhe të tërhiqen nga territori i uzinës Azot”, tha ministria në një deklaratë për shtyp.

Ministria tha se ishte e përgatitur të kryente një "operacion humanitar" të mërkurën për të evakuuar civilët nga uzina kimike Azot e kontrolluar nga ukrainas në territorin e kontrolluar nga Rusia në veri.

"Ushtria ruse njoftoi gatishmërinë e saj për të kryer një operacion humanitar për evakuimin e civilëve nga Azot në drejtimin verior, në drejtim të qytetit Svatove, në territorin e pushtuar nga Rusia," tha ministria, duke shtuar se Rusia do të hapë një korridor evakuimi për civilët të mërkurën midis orës 08:00 dhe 20:00 me orën e Moskës.

Kreu ukrainas i administratës ushtarake të Severodonetsk tha të martën se pak më shumë se 500 civilë vazhduan të strehohen në fabrikën kimike Azot, e cila është ende nën kontrollin e Ukrainës, dhe për të cilën autoritetet thonë se ka qenë objektiv i bombardimeve intensive nga forcat ruse.

Ministria e Mbrojtjes e Rusisë pretendoi se Ukraina kishte kërkuar një korridor për evakuimin e civilëve në territorin e kontrolluar nga ukrainas, në Lysychansk, por se "nuk është e mundur të evakuohet në mënyrë të sigurt në këtë drejtim", sepse të tre urat kryesore janë të pakalueshme.

Serhiy Haidai, kreu i administratës ushtarake të rajonit të Luhanskut, tha të hënën se kalimi midis Severodonetsk dhe Lysychansk tani ishte "i vështirë, por jo i pamundur" dhe autoritetet ukrainase thanë të martën se evakuimet ishin të ngadalta për shkak të bombardimeve të vazhdueshme, por ende të mundshme.

Në thirrjen për dorëzimin e luftëtarëve ukrainas, Ministria e Mbrojtjes e Rusisë tha se do të garantonte ruajtjen e jetëve dhe respektimin e të gjitha normave të Konventës së Gjenevës për trajtimin e robërve të luftës, siç ndodhi me shokët tuaj që më parë u dorëzuan në Mariupol.

lufta ukraine-rusi

Sondazh

Poll

MË SHUMË