Insights

Zgjedhjet pa zgjidhje në Partinë Demokratike

25 Maj 2021, 14:28 Nga DOSJA

Zgjedhjet pa zgjidhje në Partinë Demokratike

Gara në Partinë Demokratike sapo ka nisur, ndërsa për shanset në këtë ‘’betejë’’ të pabarabartë, ka menduar kryetari aktual Basha. Për ti mbytur zërat kundër, duke mos u dhënë kohë as të marrin frymë e jo më të bëjnë fushatë, Basha i afroi zgjedhjet në 13 Qershor. Pra, as tre javë kohë për 61 Bashki.

Demokratët, që për 8 vite prisnin me ankth që edhe ‘’pema’’ e kryetarit Lulzim Basha të çelte lulet e pushtetit, u zhgënjyen sërisht. Megjithëse pranvera në Shqipëri është stina e lulëzimit, për PD-në dhe Bashën, 25 Prilli rezultoi dimër. I rritur në serën politike të liderit historik Berisha, kryetari aktual i PD-së, duket se e ka mision të pamundur mposhtjen e Ramës. Për hir të së vërtetës, në zgjedhjet e 25 Prillit, Basha nuk kishte përballë PS-në e Ramës, por të gjithë makinerinë shtetërore të grasatur mirë me paratë e PPP-ve pa tendera, Policinë e Shtetit dhe atë të medimit, që nuk quhet më si dikur Sigurimi i Shetit. Sot është pagëzuar me titullin e lartë ‘’patronazhist’’.

Por, kundërshtarët e tij brenda partisë, i kujtojnë Bashës edhe gabimet e tij që nuk janë të pakta. Nga braktisja e tryezës së ndarjes territoriale, te braktisja e Parlamentit dhe e zgjedhjeve. Nga braktisja e çadrës së lirisë, te futja nën çadrën qeverisëse të Edi Ramës. Gabime këto, që i kanë kushtuar shumë Partisë Demokratike. Për të gjitha këto, Basha jo vetëm që nuk ka kërkuar falje, por ka përjashtuar nga vendimarrja çdo zë që i ka dalë kundër. Qëndrimi i tij i dyzuar mes rrugës radikale dhe djalit të bindur ndaj Ambasadorëve, e ka shdruar atë në një kryetar mizantrop, që kurrë nuk u formatua në përmasat e një lideri.

Ky dyzim i Bashës, u duk qartë teksa pas vendimit ekstrem të djegies së mandateve, në vend të protestave të pandërprera në kohë deri në rrëzimin e Ramës, ai i mbyllte pas një telefonate që merrte nga Ambasada e Rrugës së Elbasanit. Të njëjtin qëndrim as mish as peshk, mban edhe tani kur mijra demokratë votëvjedhur, janë gati të shpërthejnë në protesta. E ndërsa Basha mendon për të çimentuar këmbët e thyera të karriges së kryetarit, tentakulat e pushtetit vazhdojnë të gllabërojnë atë çka ka mbetur jashtë gardhit të tyre. AMA dhe Këshilli Drejtues i RTSH-së, janë fitoret e radhës të oktapodit qeverisës. Është hera e parë që edhe ish kryetari i PD-së që demokratët e pagëzuan lider, Sali Berisha, beson se ka bërë zgjedhjen e gabuar.

Në momentin e tij më ë vështirë Basha e ka braktisur. E ka braktisur, se nuk mund të thotë atë që ndjen: Jo, ne nuk e braktisim Berishën derisa një gjykatë të shprehet për fajësinë e tij. Jo, ne nuk do ta njohim si të ligjshme qeverinë Rama, pasi zgjedhjet u vodhën. E keqja është se edhe tre kandidatët përballë Bashës, nuk janë të qartë në rrugën që PD-ja duhet të ndjekë. Për Agron Shehajn që është rival i tij kryesor: ‘’zgjedhjet u njohën dhe ne si PD nuk kemi ç’të bëjmë’’?! Edhe pse një figurë me cilësi shumë pozitive të një personi që mund të kapi majat e suksesit falë talentit dhe aftësisve, Agron Shehaj në politikë tregon se është një lojtar diletant.

Nuk mund të pretendosh suksesin e opozitës duke thëne se ne do hymë në parlament, sepse ndërkombëtarët i njohën zgjedhjet. Edhe fëmijës po nuk qau, nuk i japin për të pirë gji – thotë populli. Opozita, sigurisht që nuk e ka më “luksin” e djegies së mandateve, por duhet të ndërthur veprimin opozitar në parlament dhe në rrugë, për të kundërshtuar maskaradën e 25 Prillit. Opozita duhet të përdorë çdo mjet dhe forum ndërkombëtar, për të denoncuar vjedhjet e zgjedhjeve. Gara e brendshme, nuk duhet ta pengojë opozitën të mbush sheshet e protestave për votën e vjedhur. Nuk ka dhunim më të rëndë të dinjitetit njerëzor, sesa vjedhja e votës. Por fatkeqësisht të katërt rivalët në garë për karrigen e kryetarit, më shumë mendojnë për kryetarllëkun, sesa për mbështetësit e tyre që janë mes katër rrugëve. Demokratët e thjeshtë tani do ti nënshtrohen regjimit duke jetuar si qytetar të dorës së dytë, ndërsa më të rinjtë kanë bërë gati valixhet. Shqipëria do vazhdojë të shpopullohet frikshëm.

Zgjedhjet e brendshme të PD-së, janë zgjedhje pa zgjidhje. Pse? Sepse rezultati është vendosur që më parë. Kushtet e garës janë të pabarabarta për sfidantët e Bashës. Ai do vazhdojë të “lulëzojë” në garën pa garë për kryetar, ndërsa do të vyshket në garën reale për të qenë lider. Një nga përkrahësit e tij që ka çelsat e numëruesit të votave, thuri për kurorëzimin e tretë të Bashës në opozitë vargjet: O PD, parti e bukur, që ke nam mbi lule shumë

Mijëra vjet behar të bëjë, ti nuk gjen bilbil (kryetar) si unë!

Iftar dhe politikë, a u prek Muaji i Ramazanit nga politikanët?

View Results

opinione opinione agron shehaj lulzim basha zgjedhjet ne pd agron shehaj lulzim basha zgjedhjet ne pd