Editorial

Prometeu ynë i zgjidhur dhe pa zjarr

20 Prill 2021, 08:45 Nga DOSJA

Sot në Shqipëri, duket shumë e lehtë të shkatërrosh, krijosh institucione … ose dhe të eleminosh institucione. Luajtja e lojës se kryeministri është Prometeu, dora vetë, është gjëja më e mirë që po bën kjo qeveri. Ajo po përpiqet të na krijojë iluzionin se kryeministri ynë është pikërisht ai që e krijoi zjarrin dhe se ne kemi fatin e madh, dhe jemi të vetmit të cilëve po iu ofrohet ta kenë këtë zjarr.

Deliri që ka pushtuar partinë në pushtet dhe deliri që ka pushtuar liderin e saj, se ai është Prometeu ynë është duke na kushtuar shtrenjtë.

Përballë gazetarit Ilir Babaramo, që sipas kryeministrit e kishte votues të sigurt të partisë së tij, kryministri nuk dha asnjë përgjigje në lidhje me korrupsionin e qeverisë së tij por, as për premtimet e pambajtura në këto tetë vjetë.

Duhet ta pranojmë se Iliri nuk ishte shumë “agresiv”, madje nëse “Prometeu” nuk donte të përgjigjej, Iliri arrinte në një moment që e braktiste pyetjen por, edhe pse i qetë, gazetari e nxorri nga kafazi i egërsirës së zbutur, atë që nuk qenkërka i zakonshëm si ne, atë që është specie e veçantë, atë që bën pjesë tek ai grusht njerëzish që kanë ndryshuar dhe po ndryshojnë botën, atë që është më shumë se sa i bindur se historia nuk do ketë më asnjë rresht për të shkruar as para por as pas tij.
“Prometeu ynë”, është në delirin e plotë se, para tij por dhe pas tij nuk ka ekzistuar dhe nuk ka për të ekzistuar më asgjë.

Në këto tetë vjetë kemi parë tundimin e madh që kryeministri ynë ka pasur dhe vazhdon të ketë për të mohuar dhe zhbërë gjithçka që është krijuar apo që edhe thjesht ka ekzistuar përpara ardhjes së tij në pushtet.

Çdo akt korrupsioni, shkatërrimi apo eleminimi institucionesh, paraqitet si revolucioni rilindas për popullin tonë. Mbushja me mbështetësit e tij kriminelë dhe të korruptuar të gjithë sistemit të drejtësisë, ekzekutivit, por dhe legjislativit, e ka çuar në një çoroditje totale shoqërinë tonë, duke e trajtuar vendin si nën një spastrim total.
Reforma në drejtësi, mua, më jep idenë e një hekurpunesi i cili e fut hekurin në zjarr për ta rrahur të nxehtë por në fakt nis ta rrahë kur hekuri është ftohur plotësisht.

Asnjë shqiptar nuk ka përfituar të mira apo jetë të përmirësuar, nga reformat rilindase, përveç sekserëve qeveritar, kriminelëve dhe pushtetarucëve servil.

Debati kryesor sot në Shqipëri ka të bëjë me një shtet shumë të varfër dhe shumë të vogël ku problemi nuk është si të zgjidhen problemet dhe t’i shërbehet qytetarit por, a kanë në dorë pushtetarët tanë, shumë Shtet apo pak Shtet.

Për “Prometeun” tonë nuk është aspak problem, madje është fare e lehtë, që të eleminojë me një të rënë të lapsit çdo institucion që atij i duket se i ndërpret rrugën, madje edhe të krijojë institucione sipas dëshirës si si SPAK apo OFL apo ministria e Elisa Spiropalit, për të zhytur vetëdijen tonë të humbur në idenë imagjinare se ky është i vetmi që po na mbron me të gjitha forcat.

Sigurisht që institucionet duhet të përmirësohen dhe rruga për përmirësim e tyre mund të përfshijë reformim, bashkim, zvogëlim ose zgjerim të tyre, por gjithmonë duke studiuar rolin dhe ndikimin pozitiv që do të kenë këto tek ne qytetarët.

Shteti i fortë nuk është ai që ka më shumë të punësuar në sektorin publik se sa në sektorin privat por, është ai që ofron qëndrueshmëri institucionale, parashikueshmëri dhe dobishmëri për qytetarët e tij, pavarësisht nga ideologjia e sundimtarit. Është ai shtet që ka zyrtarë të karrierës, të specializuar në fushën e tyre dhe që kanë efikasitet. Është ai që nuk delirizohet nga një kryeministër të cilit i ka hipur në kokë të vetëquhet “Promete”.

Të luash me Lego duke bërë dhe zhbërë Shtetin, sipas dëshirës, nuk ndihmon në sundimin e ligjit, në krijimin e stabilitetit për investimet e huaja por dhe të brendshme.

“Prometeu ynë i zgjidhur” duke kërkuar mandatin e tretë vetëm me suksese imagjinare, është duke dashur të na lidh të gjithëve./ Dosja.al

Rama është propozuar për president nga disa deputetë socialiste, mendoni se:

View Results

editorial editorial edi rama ilir babaramo meri lika sherri rama-babaramo edi rama ilir babaramo meri lika sherri rama-babaramo