Sport

Tronditje në Ganë: Një 20-vjeçar humb jetën, pas sulmit të armatosur në autobusin e ekipit

Autobusi, siç shkroi klubi në një deklaratë, "u ndalua ndërsa përpiqej të kthehej në shtëpi nga një grup burrash të maskuar të armatosur me pushkë dhe pistoleta".

13 Prill 2026, 13:18 Nga DOSJA

Tronditje në Ganë: Një 20-vjeçar humb jetën, pas

GANE - Një futbollist i ri ganez, Dominic Frimpong, ka humbur jetën pas një sulmi të armatosur në autobusin me të cilin po udhëtonte me ekipin e tij, Berekum Chelsea.

Ekipi i ligës së parë ganeze po kthehej nga një ndeshje jashtë fushe në Samreboi, jo shumë larg kufirit jugor me Bregun e Fildishtë. Autobusi, siç shkroi klubi në një deklaratë, "u ndalua ndërsa përpiqej të kthehej në shtëpi nga një grup burrash të maskuar të armatosur me pushkë dhe pistoleta".

Mesazhi vazhdon duke shpjeguar se "lojtarët dhe stafi ikën, duke u strehuar në shkurre". Megjithatë, Frimpong u qëllua në kokë dhe vdiq pak pasi mbërriti në spital.

20-vjeçari ishte i huazuar nga një klub tjetër ganez, Aduana, dhe kishte bërë 13 ndeshje dhe kishte shënuar dy gola këtë sezon, përfshirë edhe ndeshjen e tij të fundit si titullar. 

Federata e Futbollit të Ganës shprehu ngushëllimet e saj në një deklaratë: "Ky aksident tragjik përfaqëson jo vetëm një humbje të madhe për Berekum Chelsean, por për të gjithë futbollin ganez. 

Dominic ishte një talent i ri premtues, përkushtimi dhe pasioni i të cilit mishëronin frymën e ligës sonë. Ne jemi në komunikim të vazhdueshëm me klubin dhe autoritetet përkatëse dhe kërkojmë që të merren të gjitha masat e nevojshme për të siguruar që drejtësia të vihet në vend."

B.T (Dosja.al)

Sondazh

Poll

MË SHUMË