Sport

Shqipëria U-21 fiton ndaj Uzbekistanit 3-2. Shënon Rashica, Brruti realizon dopietë...

Kuqezinjtë U-21 arritën një fitore të merituar, ata e kontolluan lojën, madje humbën edhe edhe një penallti

30 Mars 2026, 20:15 Nga DOSJA
Shqipëria U-21 fiton ndaj Uzbekistanit 3-2. Shënon Rashica, Brruti

TURQI - Përfaqësuesja shqiptare U-21 fitoi ndeshjen miqësore ndaj Uzbekistanit me rezultatin 3-2, në një takim ku kuqezinjtë dominuan lojën dhe krijuan disa raste të rrezikshme gjatë gjithë takimit.

Skuadra e drejtuar nga Alban Bushi zhvilloi një paraqitje shumë të mirë, duke treguar organizim dhe efikasitet në fazën sulmuese. Golat e fitores i shënuan Ermir Rashica dhe Etnik Brruti.

Trajneri Alban Bushi e nisi takimin me këtë formacion titullar: Giulio Veliaj (GK), Diar Vokrri, Arlind Kurti, Gabriel Ramaj, Elton Fikaj, Fabjan Përndreca, Aidon Shehu, Feta Fetai, Benjamin Dibrani, Etnik Brruti dhe Ermir Rashica.

Shqipëria kaloi në avantazh në minutën e 17-të me Ermir Rashicën, i cili finalizoi një aksion të mirë të kuqezinjve. Uzbekistani reagoi shpejt dhe barazoi rezultatin në minutën e 22-të me Fayzullaev.

Megjithatë, ekipi U-21 reagoi menjëherë dhe mori sërish kontrollin e lojës. Etnik Brruti shënoi dy gola brenda dy minutash, fillimisht në minutën e 30-të dhe më pas në minutën e 32-të, duke çuar rezultatin në 3-1 për Shqipërinë.

Në pjesën e dytë kuqezinjtë patën mundësinë të thellonin avantazhin, por në minutën e 70-të Arlind Kurti humbi një goditje nga pika e penalltisë. Vetëm një minutë më vonë Uzbekistani ngushtoi shifrat në 3-2 me golin e Abdurakhmonov Firdavs.

Pavarësisht presionit të minutave të fundit, përfaqësuesja shqiptare U21 arriti të administrojë rezultatin dhe të sigurojë një fitore të merituar në këtë ndeshje miqësore.

B.T (Dosja.al)

 

Sondazh

Poll

MË SHUMË