Politike

Shkoi me helikopter në Korçë për shkak të bllokimit të rrugës, Rama sulmon mediat: Tenxheret mediatike qënkan futur në vlim, qentë të lehin

Në një postim në X, Rama ka shkruar se jo vetëm në Korçë por edhe drejt Vlorës do të udhëtojë, për të shoqëruar një grup investitorësh. 

23 Shkurt 2026, 11:57 Nga I.A
Shkoi me helikopter në Korçë për shkak të bllokimit
Edi Rama

TIRANË- Kryeministri Edi Rama ka reaguar pasi mediat kanë raportuar se ai ka shkuar në Korçë me helikopter për shkak të bllokimit të rrugës Prrenjas-Librazhd. Në një postim në X, Rama ka shkruar se jo vetëm në Korçë por edhe drejt Vlorës do të udhëtojë, për të shoqëruar një grup investitorësh. 

Rama ka komentuar se shëmbjen e këtij akti rrugor, për të cilin thekson se është një rrëshqitjeje gjeologjike dhe se qeveria s'ka asnjë faji. Kryeministri ka bërë dhe një paralelizëm më Italinë, duke publikuar një foto nga rrëshqitjet andej dhe ka shkruar se ky fenomen natyror prej javësh po rrezikon qyteza të Italisë.

Postimi i plotë:

Më thonë se qenkan futur në vlim tenxheret politike e mediatike pse unë po udhëtoj me helikopter për Korçë! Në fakt jo vetëm për Korçë, po nga Korça edhe në Vlorë, për të shoqëruar një grup investitorësh me prestigj ndërkombëtar në fushën e arsimit të lartë, e për t’iu prezantuar hapësirat e Polit të Dijes në Korçë dhe të kompleksit të ri në Vlorë, si dy destinacione me potencial për të mikpritur universitete të mirënjohura ndërkombëtare! Ata vijnë nga Rinasi në Korçë e pastaj në Vlorë me helikopterin e tyre, ndërsa ne do të përdorim helikopterin e Forcave të Armatosura, i cili me ne ose pa ne, kryen çdo muaj orët e veta të domosdoshme të fluturimit, e në këtë rast i shërben edhe një pune tjetër të mirë njëkohësisht!

Sa për aksin e bllokuar këto ditë, duhet një ligësi e madhe, një dëshpërim i thellë dhe një padije e rëndë, për t’ia faturuar qeverisë problematikën e një rrëshqitjeje gjeologjike të masivit natyror në anë të rrugës së vjetër, që ka impaktuar edhe aksin e ri, por që ka zero lidhje me ndonjë përgjegjësi profesionale a teknike të projektuesve, zbatuesve apo autoriteteve përkatëse! Në Itali po rrëshqet gjatë këtyre ditëve një masiv gjigand që rrezikon të marrë me vete një qytezë të tërë të banuar, po nuk ka ndonjë kanal a qoftë edhe portal në atë vend - parti politike jo e jo - që ta trajtojë fatkeqësinë natyrore me histerinë e këtushme, ku ky avaz është bërë një traditë e ligë. Ndërsa për fluturimin tim mbi aksin e bllokuar, kam edhe këto dy fjalë:

E para, i kam rënë Shqipërisë rrotull më shumë se tërë kryeministrat e tjerë të marrë së bashku, qysh nga krijimi i shtetit shqiptar dhe e kam prekur këtë vend në çdo qoshe, jo si turist, po si kryeshërbëtori i zgjedhur i shqiptarëve, të cilët i çmoj më shumë se çdo telendar politik a mediatik dhe më njohin më mirë se kushdo prej tyre, prandaj edhe më kanë votuar gjithnjë e më masivisht, duke i shpërfilluar rregullisht tenxheret medatike e dallaveret politike!

E dyta, me aks të lirë a me aks të bllokuar, ky fluturim me helikopter ishte planifikuar kohë më parë, pikërisht sepse grupi që vjen do të shohë Korçën, Vlorën e nesër Tiranën në vetëm 24 orë qëndrimi në Shqipëri. Por fundja çfarëdo të them unë, tenxheret do të thonë atë që kanë për të thënë dhe në fund fare, karvani do ecë përpara, qentë do vazhdojnë të lehin, veprat do jenë të vetmet që do të mbeten.

*Për qartësi, bashkëlidhur është rrëshqitja aktuale në Itali, se gati janë ta transferojnë në Shqipëri/Dosja.al

edi rama

Sondazh

Poll

MË SHUMË