Sport

Erling Haaland dhe Mo Salah, dy lojtarët që paguajnë 37 milionë euro taksa…

Ata janë futbollistët më të paguar dhe më “të ndëshkuar” finaciarisht në Mbretërinë e Bashkuar

4 Shkurt 2026, 18:30 Nga DOSJA
Erling Haaland dhe Mo Salah, dy lojtarët që paguajnë 37
Haaland dhe Salah, dy lojtarët që paguajnë më shumë taksa

ANGLI - Erling Haaland, sulmuesi i Manchester Cityt dhe Mohamed Salah, sulmuesi i Liverpoolit, kryesojnë listën e futbollistëve që kanë paguar më shumë taksa në Mbretërinë e Bashkuar gjatë vitit të kaluar, sipas listës së taksave të futbollit të Sunday Times.

Lojtari ndërkombëtar norvegjez, i cili është taksapaguesi më i ri në listë, vetëm 25 vjeç, kryeson renditjen, pasi pagoi gati 20 milionë euro taksa në dymbëdhjetë muajt e fundit, të nxitura nga një pagë e përafërt prej 580.000 eurosh në javë, plus 11.5 milionë euro nga të drejtat e imazhit dhe bonuset.

Në vendin e dytë është egjiptiani Mohamed Salah, me një kontribut tatimor prej gati 17 milionë eurosh. Si Haaland ashtu edhe Salah u renditën gjithashtu në 100 taksapaguesit më të mëdhenj të Mbretërisë së Bashkuar, duke u renditur përkatësisht në vendin e 72-të dhe të 81-të, duke ndarë listën me figura të larta nga muzika, sporti dhe biznesi si Harry Styles, Anthony Joshua dhe J.K. Rowling.

Pas dyshes sulmuese vjen Casemiro, mesfushori i Manchester United, dhe Raheem Sterling, i cili këtë javë e ndërpreu kontratën e tij me Chelsean me marrëveshje të ndërsjellë, me pagesa të vlerësuara përkatësisht prej 12.5 dhe 11.25 milionë eurosh.

Vetëm 120.000 euro pas Sterling është mbrojtësi i Liverpoolit, Virgil van Dijk, ndërsa lojtarët portugezë Bruno Fernandes (Manchester United) dhe Bernardo Silva (Manchester City) gjithashtu spikasin në listë, të dy me pagesa tatimore afër 10.45 milionë paund.

Në seksionin e biznesit, vëllezërit Fred dhe Peter Done, themelues të grupit të basteve Betfred, kryesojnë listën vjetore të taksave të Sunday Times për herë të parë, pasi kanë paguar një faturë tatimore prej 464.1 milionë eurosh gjatë vitit të kaluar.

Raporti tregon se 100 taksapaguesit kryesorë të vendit paguan së bashku 6.679 miliardë euro, një rritje nga 5.782 miliardë eurot e regjistruara vitin e kaluar.

B.T (Dosja.al)

Sondazh

Poll

MË SHUMË