Sport

Java e 13-të në ‘lupën’ e Disiplinës së FSHF-së: Gjobitet Elbasanin dhe Flamurtari…

Gjithashtu edhe zyrtari i Vorës, Bazion Tragaj u dënua me dy ndeshje pezullim për provokim të tifozëve, ndërsa Bylisi e kalon me një paralajmërim

2 Dhjetor 2025, 19:35 Nga DOSJA
Java e 13-të në ‘lupën’ e Disiplinës së

TIRANE - Federata Shqiptare e Futbollit nëpërmjet Komisionit të Disiplinës mori vendimet ndëshkuese për problematikat e shfaqura në fundjavë në futbollin shqiptar.

Kështu qeveria e futbollit në vend gjobiti Elbasanin me 50 mijë lekë gjobë për sjellje të gabuar të spektatorëve.

E njëjta masë ndëshkuese edhe për Flamurtarin, ndërkohë që zyrtari i Vorës, Bazion Tragaj u dënua me dy ndeshje pezullim për provokim të tifozëve, ndërsa Bylisi e kalon me një paralajmërim.

Ja vendimet më të fundit të Komisionit të Disiplinës dhe Etikës së FSHF-së:

AF Elbasani, për sjellje të gabuar të spektatorëve, duke ndezur flakadanë dhe mjete të tjera piroteknike, në bazë të nenit 17/2/c të KDE, dënohet me gjobë në masën 50.000 (pesëdhjetë mijë) lekë.

Flamurtari FC, për sjellje të gabuar të spektatorëve, duke ndezur mjete piroteknike dhe duke përdorur kore fyese ndaj lojtarëve të ekipit kundërshtar, në bazë të neneve 17/2/c dhe 17/2/e të KDE, dënohet me gjobë në masën 50.000 (pesëdhjetë mijë) lekë.

Zyrtari i KF Vora, Bazion Tragaj, për provokim të spektatorëve, në bazë të nenit 14/1/f të KDE, dënohet me 2 (dy) ndeshje pezullim nga veprimtaritë.

KF Bylis, në bazë të nenit 6/1/a të KDE, paralajmërohet se në rast të përsëritjes së vonesave për zbatimin në kohë të detyrave sipas Rregullores së Aktivitetit, do të jetë subjekt i masave disiplinore që parashikon Kodi i Disiplinës dhe Etikës dhe Rregulloret e FSHF.

KS Kastrioti, në bazë të nenit 6/1/a të KDE, paralajmërohet se në rast të përsëritjes së sjelljes së gabuar të spektatorëve, do të jetë subjekt i masave disiplinore që parashikon Kodi i Disiplinës dhe Etikës dhe rregulloret e FSHF.

Zyrtari i FK Pogradeci, Elton Kllogjeri, për sjellje të dhunshme ndaj lojtarëve kundërshtar, në bazë të nenit 14/1/h të KDE, dënohet me 3 (tre) ndeshje pezullim nga veprimtaritë.

Kundër vendimit lejohet ankim brenda 3 (tre) ditëve përpara Komisionit të Apelit.

B.T (Dosja.al)

Sondazh

Poll

MË SHUMË