Aktualitet

50 ditë në burg pas një aksidenti rrugor/ Flet profesori italian nga burgu i Fierit: Nuk kërkoj mëshirë, por të vërtetën

Mesazhin e profesorit italian e ka publikuar bashkëshortja e tij, Vanessa Castelli, e cila e vizitoi sot në burgun e Fierit, ku ai mbahet në paraburgim pas një aksidenti rrugor më 8 gusht.

30 Shtator 2025, 20:43 Nga E. D
50 ditë në burg pas një aksidenti rrugor/ Flet profesori italian
Michele D'Angelo

FIER- Profesori italian Michele D'Angelo, i cili po mbahet në burgun e Fierit prej 50 ditësh ka shprehur mirënjohje ndaj atyre që po e mbështesin dhe po i japin zë asaj që ka ndodhur. Mesazhin e profesorit italian e ka publikuar bashkëshortja e tij, Vanessa Castelli, e cila e vizitoi sot në burgun e Fierit, ku ai mbahet në paraburgim pas një aksidenti rrugor më 8 gusht.

"Nuk mund ta mohoj se masa e paraburgimit në burg është, sipas mendimit tim, e tepërt. Është një situatë jashtëzakonisht e vështirë, e bërë edhe më e vështirë nga fakti që jam larg shtëpisë, në një vend gjuhën e të cilit nuk e flas. Duke marrë parasysh sjelljen time, historinë time personale dhe profesionale, si dhe ekzistencën e metodave alternative që mund të sigurojnë pajtueshmërinë me procedurat pa kompromentuar më tej shëndetin dhe ekuilibrin tim psikologjik, shpresoj vërtet që ky reflektim të pritet me kujdes," thotë Michele D'Angelo në mesazhin e tij. 

Gjithashtu Profesori, nëpërmjet gruas së tij, përsërit besimin në institucionet lokale. Ai u shpreh se beson në punën e autoriteteve shqiptare dhe në aftësinë e tyre për të vlerësuar çdo faktor në mënyrë të paanshme

"Unë besoj në punën e autoriteteve shqiptare dhe në aftësinë e tyre për të vlerësuar çdo faktor në mënyrë të paanshme," theksoi Michele D'Angelo. 

Në zemër të mesazhit është mbështetja e kaq shumë njerëzve: "Mbështetja që po marr nga Vanessa, nga kolegët, nga studentët, nga institucionet është ajo që më mban larg shembjes. Është spiranca ime. Çdo fjalë që vjen nga jashtë, çdo gjest, çdo shenjë shqetësimi është si një dritare që hapet. Vanessa më mban të informuar, më tregon se çfarë po ndodh dhe më transmeton forcën e dikujt që nuk ka pushuar kurrë së besuari në mundësinë e një interpretimi të ekuilibruar të ngjarjeve."

Michele D'Angelo tha në fund të mesazhit se nuk kërkon mëshirë, por të vërtetën e ngjarjes. 

"Dhe që këtej, vazhdoj të jetoj këto ditë me disiplinë, durim dhe shpresën se kjo vëmendje mund të transformohet në qartësi. Nuk po kërkoj mëshirë, por të vërtetë. Nuk po kërkoj privilegj, por proporcion," përfundoi ai.

 

michele d\'angelo

Sondazh

Poll

MË SHUMË