Bota

Qyteti i Gazës nën rrethim nga ushtria izraelite/ Dhjetëra të vdekur dhe të zhvendosur

Me sulmin ndaj Qytetit të Gazës, Netanyahu dhe aleatët e tij në qeveri thonë se duan ta shkatërrojnë Hamasin, sulmi i paprecedentë i të cilit ndaj Izraelit më 7 tetor 2023 shkaktoi luftën, dhe të kthejnë pengjet që u rrëmbyen atë ditë dhe që ende mbahen atje.

31 Gusht 2025, 10:36 Nga I.A
Qyteti i Gazës nën rrethim nga ushtria izraelite/ Dhjetëra
Gaza

GAZA- Izraeli po përshkallëzon rrethimin e Qytetit të Gazës, ndërsa Komiteti Ndërkombëtar i Kryqit të Kuq paralajmëron kundër evakuimit masiv të popullsisë. Pavarësisht presionit në rritje, si jashtë vendit ashtu edhe në Izrael, për t'i dhënë fund luftës, qeveria e Benjamin Netanyahut thotë se dëshiron të vazhdojë ofensivën dhe ushtria po përgatitet për një sulm të përgjithshëm në Qytetin e Gazës. Ushtria e ka konsideruar evakuimin e qytetit "të pashmangshëm".

Me sulmin ndaj Qytetit të Gazës, Netanyahu dhe aleatët e tij në qeveri thonë se duan ta shkatërrojnë Hamasin, sulmi i paprecedentë i të cilit ndaj Izraelit më 7 tetor 2023 shkaktoi luftën, dhe të kthejnë pengjet që u rrëmbyen atë ditë dhe që ende mbahen atje. Në Izrael, qytetarët që kundërshtojnë sulmin e planifikuar në Qytetin e Gazës kanë frikë se ky sulm do t'u kushtojë jetën më shumë ushtarëve dhe do të rrezikojë sigurinë e pengjeve që u rrëmbyen më 7 tetor dhe që janë ende gjallë.

Nga ana e tij, Komiteti Ndërkombëtar i Kryqit të Kuq paralajmëroi të shtunën (30/8) kundër evakuimit masiv të popullsisë nga Qyteti i Gazës, ndërsa ushtria intensifikon rrethimin e qytetit përpara ofensivës së madhe që ka njoftuar se do të nisë kundër lëvizjes islamiste palestineze Hamas. Ndërsa Rripi i Gazës është shkatërruar pas 23 muajsh lufte, Mbrojtja Civile, shërbimi i ndihmës së shpejtë, raportoi 66 vdekje të shtunën nga sulme të shumta izraelite në territorin palestinez, kryesisht në Qytetin e Gazës.

"Është e pamundur të kryhet një evakuim masiv i Qytetit të Gazës në një mënyrë të sigurt dhe dinjitoze në rrethanat aktuale", tha Mirjana Spoliaric, presidente e Komitetit Ndërkombëtar të Kryqit të Kuq, në një njoftim për shtyp.

Mijëra banorë kanë ikur tashmë nga qyteti, i cili ndodhet në pjesën veriore të enklavës palestineze. Sipas OKB-së, gati një milion njerëz jetojnë në guvernatoratin e Gazës, i cili përfshin qytetin dhe rrethinat e tij.

"Granatimet ishin të dendura, nuk u ndalën asnjë sekondë, nuk mund të flinim", tha Abu Mohammad Kisco, një banor i lagjes Zeitoun, duke folur në telefon. Ai tha se u largua nga qyteti sepse "nuk ka vend të sigurt" në Rripin e Gazës./Dosja.al

mirjana spoliaric benjamin netanyahu lufta ne lindjen e mesme

Sondazh

Poll

MË SHUMË