Bota

Mijëra persona marrin pjesë në Paradën e Krenarisë në Budapest pavarësisht ligjit të ri

Paradat e Krenarisë, organizime vjetore në shumë qytete perëndimore synojnë t’i çojnë përpara të drejtat e komunitetit LGBTQ (lesbike, homoseksualë, biseksualë dhe trangjinorë). Iniciativa e Orbanit është kundërshtuar në Hungari, ndërsa Bashkimi Evropian dhe grupe për të drejta të njeriut i kanë dënuar këto veprime të tij.

28 Qershor 2025, 15:04 Nga N.F
Mijëra persona marrin pjesë në Paradën e Krenarisë
Parada

BUDAPEST- Mijëra persona pritet të sfidojnë një ndalesë qeveritare të shtunën, duke marrë pjesë në Paradën e Krenarisë në kryeqytetin e Hungarisë, Budapest. Qeveria e popullistit të krahut të djathtë, Viktor Orban dhe policia e Budapestit e kanë ndaluar organizimin vjetor, nën pretekstin se ligji i ri ndalon që të rinjtë t’i ekspozohen stilit joheteroseksual të jetesës.

Megjithatë, kryetari i Budapestit, Gergely Karacsony, lider i opozitës, e ka përkrahur marshin duke e bashkë-organizuar me komunën, në mënyrë që ai të shpallet organizim komunal dhe kështu nuk kërkon miratim prej policisë.

Paradat e Krenarisë, organizime vjetore në shumë qytete perëndimore synojnë t’i çojnë përpara të drejtat e komunitetit LGBTQ (lesbike, homoseksualë, biseksualë dhe trangjinorë). Iniciativa e Orbanit është kundërshtuar në Hungari, ndërsa Bashkimi Evropian dhe grupe për të drejta të njeriut i kanë dënuar këto veprime të tij.

“Jemi duke ngritur zërin për veten tonë. Nëse ligji nuk përmbyset, lindja e Evropës mund të përballet me një valë masash të tilla”, ka thënë Viktoria Radvanyi, organizatore e paradës.

Megjithatë Orbani ka paralajmëruar më 27 qershor se pjesëmarrësit duhet të jenë të vetëdijshëm për “pasojat ligjore”.

Pjesëmarrësit mund të përballen me gjoba deri në 850 dollarë, derisa organizatorët mund të burgosen deri në një vit. Autoritetet mund të përdorin teknologji për identifikim të fytyrës për t’i identifikuar pjesëmarrësit. Mirëpo, Karacsony ka insistuar se pjesëmarrësit nuk do të ndëshkohen.

“Policia e ka vetëm një detyrë, dhe atë serioze, të garantojë sigurinë e shtetasve hungarezë dhe evropianë që marrin pjesë në organizim”, ka thënë ai më 27 tetor.

Ministri i Drejtësisë në Hungari, Bence Tuzson, e ka kërcënuar Karacsonyn me një vit burgim për ndihmën e ofruar në organizimin të ngjarjes. Ministri i ka paralajmëruar edhe ambasadat e huaja në Budapest për ndalesën ekzistuese.

Në edicionin e 30-të të paradës pritet të marrin pjesë rreth 35.000 njerëz. Disa ligjvënës dhe ministra evropianë nga vendet e bllokut evropian pritet të marrin pjesë, po ashtu, në këtë organizim, si shenjë solidariteti me pjesëmarrësit./ REL

parada e krenarise ne budapest

Sondazh

Poll

MË SHUMË