Bota

"Vezët e tërbimit"/ Çmimi i vezëve në SHBA rritet me 60% në një vit, e papërballueshme për amerikanët

Inflacioni i ushqimeve vazhdon të godasë xhepat e amerikanëve, me vezët që shiten më shtrenjtë se kurrë, duke shtuar presionin mbi administratën Trump

10 Prill 2025, 20:53 Nga A.Ll
"Vezët e tërbimit"/ Çmimi i vezëve në SHBA
Veze ne supermarketet amerikane

SHBA - Inflacioni në SHBA po vazhdon të shkaktojë shqetësime për ekonominë amerikane, dhe veçanërisht për xhepat e qytetarëve, ndërsa çmimet e ushqimeve vazhdojnë të rriten. Një nga produktet më të prekura është vezët, të cilat kanë shënuar një rritje dramatike prej 60% në krahasim me vitin e kaluar.

Një paketë me 12 vezë tani kushton 6,23 dollarë (5,56 euro), krahasuar me 4,95 dollarë (4,42 euro) që kushtonte në janar, kur Donald Trump mori detyrën.

Kjo rritje ka nxitur kritika, sidomos përballë situatës ekonomike të pasigurtë që ka sjellë lufta tregtare mes SHBA-së dhe Kinës, e cila ka përdorur tarifat si një armë të fuqishme për të ndikuar në çmimet globale.

Edhe pse në përgjithësi inflacioni është raportuar më i ulët se sa parashikohej, me një rritje të çmimeve prej 2.4% në mars (nga 2.5% që u parashikua), çmimet e ushqimeve, sidomos vezët, vazhdojnë të shënojnë rritje të qëndrueshme.

Një faktor kyç që ka ndikuar në këtë rritje është një epidemi sëmundjesh të shpendëve që ka prekur fermat amerikane, duke detyruar vrasjen e 36 milionë zogjve në dy muajt e fundit, përfshirë 2.1 milionë vetëm në mars. Kjo ka çuar në një rritje të kërkesës për vezë nga importet, kryesisht nga Turqia, dhe ka shtuar koston e produktit në treg.

Rritja e çmimeve të vezëve ka përkeqësuar pasigurinë ekonomike për shumë amerikanë, pasi ky produkt është një nga ushqimet bazë në dietën e përditshme. Me Pashkët që po afrohen, kërkesa për vezë pritet të vazhdojë të rritet, duke i shtuar më tej presionin çmimeve.

Administrata Trump është përballur me kritika për menaxhimin e inflacionit dhe për pasojat që lufta tregtare ka pasur në jetën e përditshme të amerikanëve.

Çmimi i vezëve, i cili ka marrë shumë vëmendje në mediat e vendit, është një simbol i ndikimit të politikave ekonomike dhe tregtare të Shtëpisë së Bardhë mbi sektorin e ushqimeve.

 

rritja e cmimit vezet shba

Sondazh

Poll

MË SHUMË