Bota

Tërmeti në Tibet/ Rritet bilanci, shkon në 95 numri i viktimave, 130 kanë mbetur të plagosur

Ai goditi në rajonin autonom të Tibetit, në perëndim të vendit, pak pas orës 9:05 (01:05 GMT), sipas Qendrës së Rrjeteve të Tërmeteve në Kinë

7 Janar 2025, 10:30 Nga ZH.LL

Tërmeti në Tibet/ Rritet bilanci, shkon në 95 numri i viktimave,

KINË- Të paktën 95 persona janë konfirmuar të vdekur dhe 130 janë lënduar pas një tërmeti të madh që goditi rajonin malor të Tibetit të martën në mëngjes, thonë mediat shtetërore kineze. Shumë njerëz të tjerë kanë ngecur nën rrënoja të shtëpive dhe ndërtesave, raporton Sky News.

Ai goditi në rajonin autonom të Tibetit, në perëndim të vendit, pak pas orës 9:05 (01:05 GMT), sipas Qendrës së Rrjeteve të Tërmeteve në Kinë.

Shërbimi Gjeologjik i SHBA-së (USGS) tha se ishte 7.1 ballë.

Transmetuesi shtetëror i televizionit qendror kinez (CCTV) e vendosi epiqendrën në qarkun Tingri, rreth 240 milje nga kryeqyteti i Tibetit Lhasa dhe rreth 14 milje nga qyteti i tij i dytë më i madh Shigatse - i njohur gjithashtu si Xigaze.

Sipas Ministrisë së Menaxhimit të Emergjencave të Kinës, rreth 1500 punonjës të zjarrfikësve dhe shpëtimit janë vendosur, por zona është e largët dhe kushtet e vështira.

Qendra e Rrjeteve të Tërmeteve në Kinë tha se lartësia mesatare në zonën pranë epiqendrës është rreth 4200 m (13800 këmbë).

Shigatse është një nga qytetet më të shenjta të Tibetit dhe shtëpia e Manastirit Tashilhunpo - selia tradicionale e Panchen Lama, i dyti vetëm pas Dalai Lamës në budizmin tibetian. Media shtetërore tha se tërmeti fillestar u pasua nga dhjetëra pasgoditje me magnitudë deri në 4.4

Lëkundjet u ndjenë gjithashtu në kryeqytetin e Nepalit, Katmandu, si dhe në Butan dhe në Indinë veriore.

Udhëheqësi kinez Xi Jinping bëri thirrje për një përpjekje të fuqishme për të shpëtuar njerëzit dhe për të rivendosur ata, shtëpitë e të cilëve janë dëmtuar. Zëvendëskryeministri Zhang Guoqing është dërguar në zonë për të mbikëqyrur punën.

Ka pasur 10 tërmete me magnitudë 6 ballë në zonën ku goditi tërmeti i së martës gjatë shekullit të kaluar, tha USGS. Tërmetet në Kinë zakonisht ndodhin në Rrafshnaltën Tibetiane ose në skajet e saj.

Zona është vendi ku pllakat e Indisë dhe Euroazisë përplasen dhe shkaktojnë ngritje që mund të jenë mjaft të forta për të ndryshuar lartësitë e majave të Himalajeve.

kine termet ne tibet

Sondazh

Poll

MË SHUMË