Bota

Vijon përparimi i ushtrisë ukrainase në Rusi, evakuohen banorët e rajonit të Belgorodit

Kievi ka rritur aktivitetin ushtarak pranë kufirit disa ditë pas inkursionit më të madh në territorin rus që nga fillimi i luftës në 2022.

12 Gusht 2024, 09:13 Nga r.ll
Vijon përparimi i ushtrisë ukrainase në Rusi, evakuohen
Foto ilustruese

MOSKË- Rusia njoftoi sot evakuimin e banorëve nga një pjesë e rajonit të Belgorodit, në kufi me Ukrainën, për shkak të një sulmi ukrainas dhe në sfondin e një inkursioni të armatosur ukrainas në rajonin fqinj rus të Kurskut.

"Mëngjesi paralajmëron alarme: ka aktivitete armiqësore në kufirin e rajonit Krasnaya Yaruga", thotë Guvernatori i Rajonit të Belgorodit Vyacheslav Gladkov në një video në Telegram. “Për sigurinë e jetës dhe të shëndetit të popullatës sonë, ne po fillojmë të lëvizim banorët e kësaj zone", sqaroi ai.

"Jam i sigurt se ushtarët tanë do të bëjnë gjithçka për t'u përballur me kërcënimin që është shfaqur ," shtoi Gladkov, shkruajnë mediat e huaja.

Kievi ka rritur aktivitetin ushtarak pranë kufirit disa ditë pas inkursionit më të madh në territorin rus që nga fillimi i luftës në 2022. Forcat ukrainase pushtuan territorin rus duke kaluar kufirin të martën e kaluar dhe sulmuan disa pjesë perëndimore të rajonit Kursk të Rusisë. Ishte një sulm i befasishëm, për të cilin Reuters raporton se mund të synojë t'i japë Ukrainës një avantazh në bisedimet e mundshme të armëpushimit pas zgjedhjeve në SHBA.

Dje, të dielën, Rusia, e kapur në befasi nga ofensiva ukrainase, stabilizoi frontin në rajonin e Kurskut, megjithëse luftimet vazhdojnë sot në një pjesë të territorit rus, sipas blogerëve rusë me bloge për luftën.

lufta ukraine-rusi belgorod

Sondazh

Poll

MË SHUMË