Bota

Luftimet ashpërsohen, Kremlini kërcënon Ukrainën pas sulmit që la 14 të vrarë në qytetin rus: Ky krim nuk do mbetet pa u ndëshkuar

Një burim brenda shërbimeve të sigurisë ukrainase ka thënë për BBC se forcat e Kievit ishin pas sulmeve të së shtunës në Belgorod.

30 Dhjetor 2023, 18:18 Nga r.ll

Luftimet ashpërsohen, Kremlini kërcënon Ukrainën pas sulmit

foto nga rusia

RUSI- Ministria ruse e Mbrojtjes ka dhënë një deklaratë duke reaguar ndaj sulmit ukrainas në qytetin rus Belgorod ku mbetën të vrarë 14 persona, sipas Rusisë. Ajo thotë se sulmet u kryen me raketa “Olkha” të Ukrainës dhe “Vampir” të prodhimit çek, të pajisura me koka luftarake me municione thërrmuese dhe se sistemet e mbrojtjes ajrore kapën shumicën e raketave.

"Megjithatë, disa raketa dhe pjesë grupore nga raketat e rrëzuara Vilkha goditën qytetin e Belgorod, ku 12 të rritur dhe dy fëmijë u vranë si rezultat dhe 108 persona janë plagosur”, thuhet në deklaratë.

Më tej në deklaratë thuhet se nëse raketat Vilkha godasin drejtpërdrejt objektivat e tyre dhe lëshonin municione thërrmuese, pasojat do të ishin pa masë më të rënda, shkruan BBC.

“Regjimi i Kievit, i cili kreu këtë krim, po përpiqet të shkëpusë vëmendjen nga disfatat në front dhe gjithashtu dëshiron të na provokojë”, thuhet në deklaratë.

“Ky krim nuk do të mbetet pa u ndëshkuar”, përfundon deklarata.

Një burim brenda shërbimeve të sigurisë ukrainase ka thënë për BBC se forcat e Kievit ishin pas sulmeve të së shtunës në Belgorod. Burimi tha se ata synonin rreptësisht infrastrukturën ushtarake dhe fajësoi punën e paaftë të mbrojtjes ajrore ruse për viktimat civile. Sulmet e Ukrainës filluan dje në mbrëmje, tha ai.

Burimi tha se Ukraina lëshoi më shumë se 70 dronë kundër objektivave në të gjithë Rusinë, duke thënë se ata ishin një përgjigje ndaj sulmeve terroriste të Rusisë ndaj qyteteve dhe civilëve ukrainas.

lufta ukraine-rusi