Aktualitet

Megaoperacion për asgjësimin e bimëve narkotike në Shkodër, asgjësohen 13 mijë rrënjë

FNSH dhe RENEA u angazhuan në këtë operacion duke goditur mijëra rrënjë kanabis, në zonat e thella në malësinë e Shkodrës

7 Shtator 2023, 10:12 Nga DOSJA
Megaoperacion për asgjësimin e bimëve narkotike në
Policia

SHKODËR-Një operacion anti-drogë është zhvilluar në Shkodër, ku janë asgjësuar 12 831 bimë narkotike cannabis sativa. FNSH dhe RENEA u angazhuan në këtë operacion duke goditur mijëra rrënjë kanabis, në zonat e thella në malësinë e Shkodrës. Autorët e kultivimit të bimëve narkotike janë ende të paidentifikuar.

NJOFTIMI I POLICISË:

Shkodër/Megaoperacion nga ajri dhe nga toka, për asgjësimin e bimëve narkotike të kultivuara në zona të thella malore të qarkut Shkodër. Finalizohet në kushte të vështira terreni dhe në shkallë të lartë rrezikshmërie për jetën e punonjësve të Policisë, megaoperacioni policor i koduar “Fly”. Asgjësohen në total, nëpërmjet djegies, 12 831 bimë narkotike cannabis sativa.

Megaoperacioni u zhvillua nga Drejtoria Vendore e Policisë Shkodër, në bashkëpunim me Repartin Special “RENEA” dhe me FNSH-të Tiranë dhe Fier. Në këtë megaoperacion, nga ajri u angazhuan 50 efektivë të repartit “RENEA” dhe nga toka, 500 efektivë të DVP Shkodër, të komisariateve në varësi të saj dhe të FNSH-ve Tiranë dhe Fier. Efektivët e repartit “RENEA” janë transportuar me helikopter, pasi bimët e kultivuara ishin në një terren shumë të thellë malor dhe me rrezikshmëri të lartë për jetën e punonjësve të Policisë.

-Gjatë megaoperacionit, nga ajri, morën pjesë efektivët e repartit “RENEA”dhe grupe hetimore. Efektivët e RENEA-s, me anë të helikopterit, mundën të mbërrinin në vende të ndryshme, në territorin e fshatit Palaj, njësia administrative Shosh, ku ishin kultivuar bimë narkotike cannabis sativa. Nga këto zona, Policia asgjësoi nëpërmjet djegies, 2220 bimë narkotike cannabis sativa.

-Në vijim, gjatë këtij megaoperacioni, nga toka, shërbimet e DVP Shkodër, të komisariateve të Policisë në varësi të saj dhe të FNSH-ve Tiranë dhe Fier, nga terrene të vështira malore në Mnelë, Shllak, Temal, Vilzë, Prekal, Ura e Shtrenjtë, Kir dhe Ana e Malit, asgjësuan 10 611 bimë narkotike cannabis sativa. Strukturat hetimore të DVP Shkodër dhe të komisariateve në varësi të saj, në bashkëpunim me Prokurorinë, vijojnë punën për identifikimin dhe arrestimin e autorëve të kultivimit të bimëve narkotike, të asgjësuara gjatë megaperacionit “Fly”.

Sondazh

Poll

MË SHUMË