Ekonomi

MASA/ Zhvlerësimi i euros, Ibrahimaj: Lehtësojmë eksportuesit, ribursojmë TVSH brenda 3 ditëve

Ibrahimaj prezantoi sot dy aktet normative që do t’u vijnë në ndihmë sipërmarrësve që eksportojnë më tepër se 70% të prodhimit të tyre.

11 Maj 2023, 14:37 Nga A.B
MASA/ Zhvlerësimi i euros, Ibrahimaj: Lehtësojmë eksportuesit,
Delina Ibrahimaj

TIRANË- Ministrja e Financave dhe Ekonomisë ka prezantuar sot masat që kanë ndërmarrë për të lehtësuar eksportuesit, pasi zhvlerësimi i euros dha një goditje për eksportuesit vendas, duke sjellë rënie të të ardhurave dhe rritje të shpenzimeve. 

Ibrahimaj prezantoi sot dy aktet normative që do t’u vijnë në ndihmë sipërmarrësve që eksportojnë më tepër se 70% të prodhimit të tyre. Një nga nismat konsiston me ngrirjen e kostove të tatim fitimit për një periudhë afatshkurtër, ku eksportuesve do u jepet mundësia për të mos i paguar deri në fund të vitit 2023.

“Kemi vendosur bashkarisht me qëllim dhënien e një zgjidhjeve afatshkurtër për arritjen e likuiditeteve të kompanive eksportuese të ngurtësojë, parapagimin e kësteve të tatim fitimit për të gjithë kompanitë ekportuese që eksportojnë më shumë se 70% të qarkullimit dhe të prodhimit të tyre.

Kemi përgatitur një akt normative, që do të miratohet shpejt nga qeveria, që këto kompani të mos paguajnë këste tatim fitimi duke krijuar kështu një mundësi të rritjes së likuiditetit që kompanitë kanë në dispozicion. Nga ana tjetër do të marrim masa me qëllim që rimbursimi i TVSH-së që merret nga eksportuesit pranë administratës tatimore, që duhet të jepet brenda një afati 30 ditor, do të jepet me një afat më të shkurtër, brenda 3 ditëve.

Këto janë dy masa afatshkurtra ndërkohë kemi vendosur krijimin e një grupi pune të përbashkët, me qëllim analizimin më tej të situatës.”- thotë Ibrahimaj.

Ndërsa kryetari i shoqatës së Eksportuesve Alban Zusi vlerësoi masat emergjente që u morën dhe bashkëpunimin me financat për zgjidhjen e kësaj problematike.

“Jemi të shqetësuar prej javësh nga rënia e euros, pasi është dëm i madh që po i shkaktohet ekonomisë. Të parët që po e ndjejnë janë eksportuesit dhe nuk do të jetë e largët dita kur do ta ndjejnë edhe bizneset e tjera”.

renia e euros delina ibrahimaj

Sondazh

Poll

MË SHUMË