Politike

Zgjedhjet në Kosovë, Basha: Populli votoi për ndryshimin, urime Albin Kurtit dhe Vjosa Osmanit

Basha: Dje populli i Kosovës dha një shembull frymëzues me pjesëmarrjen civile dhe masive në zgjedhje.
Featured image of article: Zgjedhjet në Kosovë, Basha: Populli votoi për ndryshimin, urime Albin Kurtit dhe Vjosa Osmanit Lulzim Basha dhe Albin Kurti.

Tiranë- Për zgjedhjet në Kosovë kryedemokrati Lulzim Basha është shprehur se qytetarët atje votuan për ndryshimin, duke i dëshmuar botës se janë në një demokraci funksionuese.

Basha uron Albin Kurtin dhe Vjosa Osmanin për rezultatet dhe thekson se zgjedhjet treguan profesionalizëm.

Reagimi: 

Kosova hapi një faqe të re në rrugëtimin e saj si shtet demokratik. Populli i Kosovës votoi për ndryshim duke mandatuar opozitën për të udhëhequr në rrugën e transformimit ekonomik dhe integrimit euro-atlantik. Urimet më të përzemërta LVV dhe LDK, Albin Kurtit dhe Vjosa Osmanit për fitoren.

Përgëzime udhëheqësve të forcave të tjera politike garuese në këto zgjedhje që me qëndrimet e tyre europiane japin garanci për ecjen përpara të Kosovës.

Dje populli i Kosovës dha një shembull frymëzues me pjesëmarrjen civile dhe masive në zgjedhje, Policia e Kosovës tregoi profesionalizëm të lartë në ndalimin e menjëhershëm të atyre që cënuan sekretin e votës së lirë duke e fotografuar atë. Kosova i dëshmoi botës se është një demokraci funksionuese dhe se meriton sa më parë vendin dhe rolin e saj në të gjitha institucionet dhe proceset ndëkombëtare. Urime Kosovë!

Zgjedhjet e parakohshme në Kosovë u fituan nga Lëvizja Vetëvendosje e Albin Kurtit. Me 25.81% të votave kryeson Lëvizja Vetëvendosje në Kosovë. Pas saj vjen Lidhja Demokratike e Kosovës me 25,08%, të votave.  E treta në garë rendit PDK-ja me 21, 18% të votave. Zgjedhjet u zhvilluan pa asnjë incident.

J.V/Dosja.al

Shto Koment