Sport

Vllaznia hap fals në Shkodër, vetëm 0-0 me një Kastriot të pamposhtur

Me këtë barazim skuadra shkodrane e thelloi përkohësisht në 10 pikë avantazhin ndaj dy ndjekëseve më të afërta, Partizani dhe Teuta, të cilat do të përballen midis tyre nesër në Durrës
Featured image of article: Vllaznia hap fals në Shkodër, vetëm 0-0 me një Kastriot të pamposhtur
Përditësuar:

SHKODER – Pas 3 fitoreve radhazi, Vllaznia regjistroi ndalesën e parë për vitin 2021, pasi nuk shkoi më shumë se një barazim pa gola ndaj Kastriotit në “Loro Boriçi”.

Përballë një Vllaznie, që donte me çdo kusht tri pikët, skuadra e Ramazan Ndreut u mbrojt mirë dhe arriti t’u merrte një pikë kryesuesve të Superiores, brenda në Shkodër. Skuadra e Brdariç ishte dominuese në lojë, por çaloi në fazën sulmuese dhe sidomos në pasimin e fundit, duke mos mundur këtë herë të gjejë dot rrugën e rrjetës.

Për t’u përmendur edhe fakti që Kastrioti e mbylli ndeshjen me 10 lojtarë, pasi në minutën e 93-të, Sokol Neziri u ndëshkua me karton të kuq, pas një ndërhyrjeje të rëndë ndaj brazilianit Da Silva. Gjithsesi, nervozimi ishte i pranishëm në fushën e “Loro Boriçit”, ndërkohë që krutanët pretenduan edhe për një penallti.

Për më shumë bëhu pjesë e grupit më viral në Facebook, Dosja.al

36 pikë për Vllazninë pas 16 javësh, ndërkohë që Kastrioti mori një pikë të artë për t’iu larguar më shumë garës për mbijetesë. Krutanët u ngjitën në kuotën e 18 pikëve dhe duke ruajtur distancën e sigurisë nga tri vendet e fundit.

Me këtë barazim skuadra shkodrane e thelloi përkohësisht në 10 pikë avantazhin ndaj dy ndjekëseve më të afërta, Partizani dhe Teuta, të cilat do të përballen midis tyre nesër në Durrës.

B.T (Dosja.al)

Shto Koment