Editorial

Vetëm kur ndodh zbatica shihet kush ka notuar lakuriq

Bizneset e mëdha kanë notuar lakuriq. Edhe pse gjatë gjithë pandemisë janë përpjekur të tregojnë se janë ato që “përgjigjen për shoqërinë dhe zgjidhin anën sociale”, u pa qartë evazioni fiskal dhe ndikimi i tyre konstant në dobësimin e kontrollit të qeverisë mbi ta duke i ndihmuar të fitojnë para jashtë skemave ligjore.
Featured image of article: Vetëm kur ndodh zbatica shihet kush ka notuar lakuriq

Pas Covid-19 do të ndodh zbatica, sepse pandemia gjithmonë është çështje kohe. Koncepti ynë për jetën tashmë ka ndryshuar. Por, pas kësaj zbatice kush ka notuar lakuriq?

Unë mendoj se vetë sistemi kapitalist ka notuar lakuriq. Sipas gjykimit tim ky sistem është i specializuar për të gjeneruar pasuri dhe për ta shpërndarë jo në mënyrë të barabartë, ky sistem krijon shumë pabarazi dhe në vendet me korrupsion të lartë si Shqipëria, ky sistem krijon mjerim në shumicën e popullatës. Por kjo epidemi tregoi se në kushte të tilla jemi të gjithë në të njëjtën barkë, kur paraja nuk ka asnjë vlerë.

Bizneset e mëdha kanë notuar lakuriq. Edhe pse gjatë gjithë pandemisë janë përpjekur të tregojnë se janë ato që “përgjigjen për shoqërinë dhe zgjidhin anën sociale”, u pa qartë evazioni fiskal dhe ndikimi i tyre konstant në dobësimin e kontrollit të qeverisë mbi ta duke i ndihmuar të fitojnë para jashtë skemave ligjore.

Qeveria ka notuar lakuriq. Me dobësinë e saj në përgjithësi dhe në veçanti me sistemin shëndetësore i cili nuk harton dot plane emergjente të organizuara mirë ose të ketë rezerva të mjaftueshme për të shmangur vdekjet dhe kaosin ekonomik.

Bizneset e vogla dhe të mesme kanë notuar lakuriq. Pa asnjë rezervë për të përballuar kriza dhe për të dhënë pagat e punonjësve qoftë edhe për një muaj.

Ne të gjithë kemi notuar lakuriq. Ka shumë biznese dhe njerëz që, për shkak të të ardhurave të tyre të ulta, vareshin nga të gjithë ata që kam përshkruar më sipër duke qenë të punësuar tek ta. Por ka edhe nga ata që kanë pasur pak më shumë fat me punën e tyre përpara pandemisë dhe kanë në zotërim një makinë, e kanë fëmijën në shkollë private, kanë në pronësi një shtëpi pa kredi, ose dhe një punë të sigurt. Nëse jemi një nga këta njerëz me fat por nuk kemi një fond rezervë për urgjenca … atëherë edhe ne kemi notuar lakuriq dhe do të ishte mirë që me këtë pak fat që kemi pasur të mund të kishim blerë rroba banje.

Për më shumë bëhu pjesë e grupit më viral në Facebook, Dosja.al

Të shkruash dhe të flasësh për financat personale është më e vështirë sesa të jesh një Dëshmitar i Jehovait që troket derë më derë çdo fundjavë. Zakonisht ne si njerëz nuk duam të ndryshojmë përveçse kur na detyrojnë. Dhe vendimi për të ndryshuar modelet e shpenzimeve është shumë e vështirë sepse do të thotë të ndryshojmë mënyrën si e shohim botën. Ata që kanë borxhe dhe jetojnë vetëm për të sotmen e kanë shumë të vështirë të kalojnë pasojat e pandemisë.

Askush nuk e ka idenë se sa herë unë bisedoj me veten për rëndësinë e kursimit, investimit dhe përgatitjes për të ardhmen … por shumë pak kam bërë në lidhje me të. E ardhmja e qetë në kushtet Covid-19 duket shumë larg.

Me të tashmen në kushtet e pandemisë dhe përballë të ardhmes gri që na pret mendoj se nuk duhet të harrojmë ankthin dhe frikën që kaluam. Të mos harrojmë pasigurinë dhe mungesën e guximit. Të mos e harrojmë as dëshpërimin që na rrethoi. Nuk duhet t’i harrojmë se ndoshta fatkeqësia do të na trokas sërish dhe e vetmja gjë që mund të bëjmë është të ecim gjithmonë të veshur me kostumin tonë të banjos, sado i vjetër të jetë ai, rëndësi ka të mos notojmë lakuriq, pra të përgatitemi. Të përgatitemi emocionalisht, fizikisht dhe financiarisht. Këtë përgatitje e kemi vetë nën kontroll të plotë.

Por siç e kemi vërejtur tashmë, duhet të përgatitemi edhe shoqërisht. Dhe, megjithëse përgatitja sociale nuk varet vetëm nga ne, ne mund të kontribuojmë. Ne jemi e njëjta urë, dhe një urë është aq e fortë sa pjesa e saj më e dobët. Mijëra ton çeliku mund të shemben për shkak të pikës më të dobët.

Nga Meri Lika, Audit Ligjor

Shto Koment