Aktualitet

Tërmeti i 26 nëntorit, Prokuroria e Krujës: Po hetojmë, të sekuestrohen menjëherë të gjithë dokumentacionet lidhur me ndërtimet

Pas nisjes së hetimeve nga Prokuroria e Tiranës dhe Durrësit, dhe organi i akuzës në Krujë ka nisur hetimet dhe shprehet se do sekuestrojë të gjithë dokumentet që kanë të bëjnë me ndërtimet.
Featured image of article: Tërmeti i 26 nëntorit, Prokuroria e Krujës: Po hetojmë, të sekuestrohen menjëherë të gjithë dokumentacionet lidhur me ndërtimet Tërmeti

KRUJË- Prokuroria e Krujës pas tërmetit shkatrrimtar ka nisur hetimet për të gjetur dhe fajtorët e katastrofës me shembjen e banesave. Pas nisjes së hetimeve nga Prokuroria e Tiranës dhe Durrësit, dhe organi i akuzës në Krujë ka nisur hetimet dhe shprehet se do sekuestrojë të gjithë dokumentet që kanë të bëjnë me ndërtimet.

Në një njoftim për mediat organi i akuzës në Krujë shton se deri në këto momente janë kryer të gjitha veprimet e para hetimore të domosdoshme në lidhje me vendngjarjet, tre pallatet e rrëzuara ku u shkaktuan viktimat në Thumanë  dhe ndërkohë vazhdojnë veprimet edhe në objekte të tjera të dëmtuara rëndë.

NJOFTIMI I PLOTË

Lidhur me fakteqësinë natyrore, tërmetin e dt.26.11.2019, Prokuroria e Rrethit Gjyqësor Kruje, është vënë menjëherë në lëvizje për të verifikuar nëse në këtë ngjarje, ka apo jo elementë të veprave penale.

Drejtuesi i Prokurorisë, Prokurorët dhe Oficerët e Policisë Gjyqësore të Prokurorisë Krujë kanë shkuar në Njësinë Administrative Thumanë, ku rezulton se ishin shembur tre pallate, e si rezultat i kësaj shembje kanë ndërruar jetë 24 persona. Po ashtu është vijuar puna në bashkëpunim me Komisariatin e Policisë Krujë të cilët janë urdhëruar që të kryejnë të gjitha veprimet e duhura në vendgjarje, duke i orientuar ti trajtojnë si vendngjarje ku ka ndodhur një krim dhe të kryhen në çdo rast veprimet hetimore perkatese.

Rezulton gjithashtu se në rrethin ku ushtron kompetencat territoriale Prokuroria Krujë, janë dëmtuar një numër mjaft i madh banesash, nga të cilat një pjesë janë shpallur të pabanueshme dhe pjesa tjetër me dëme të konsiderueshme. Përveç pallateve të rrëzuara IKMT-ja ka prishur edhe disa pallate të tjerë të deklaruara të pabanueshme. Edhe në këto raste oficerët e policisë gjyqësore kanë kryer këqyrjen e vendit të ngjarjes dhe kanë marrë në cilesinë e provës materiale mbetje të këtyre pallateve.

Lidhur me këto raste ka dyshime,  se mund te jenë konsumuar elemente të figurave të veprave penale të parashikuara nga nenet 289 e 248 te K.Penal. Për këtë arsye janë urdhëruar oficerët e policisë Gjyqëesore që të verifikojnë:  Çdo banesë të dëmtuar rëndë, ose të shpallur të pabanueshme. Të bëjnë kqyrjen e tyre.Të marrin me cilesinë e provës një kopje të raportit të grupeve të konstatimit të dëmeve.

Të sekuestrojnë menjëherë me cilesinë e provës, çdo dokumentacion lidhur me këto ndërtime (Projekt, leje ndertimi, akt kolaudimi etj.), në çdo institicion shtetëror ku ato ndodhen. Të merren vendime për kryerje të aktit të ekspertimit vlerësues për dëmin ekonomik në çdo rast.

Deri në këto momente janë kryer të gjitha veprimet e para hetimore të domosdoshme në lidhje me vendngjarjet  (tre pallatet e rrëzuara ku u shkaktuan viktimat në Thumanë ) dhe ndërkohë vazhdojnë veprimet edhe në objekte t՞ tjera të dëmtuara rëndë.

Pas përfundimit të këtyre veprimeve të domosdoshme hetimore, janë urdhëruar Oficeret e policise Gjyqësore që të bëjnë referimet përkatëse dhe në varësi të elementeve të veprave penale që do të konstatohen, do të konkludohet për regjistrimin e procedimeve penale përkatëse.

Hetimet kanë nisur 6 ditë pas tërmetit shkatërrues ku vdiqën 51 persona dhe 913 të tjetër mbetën të plagosur. Toka vijon të dridhet ndërsa viktimat u përcollën për në banesën e fundit. Mbi 400 efektivë të Forcave të Armatosura u angazhuan që në orët e para të ngjarjes së 26 nëntorit, ku shpëtuan më shumë se 50 perona nën rrënoja. Tashmë ka nisur puna për idenftifikimin e dëmeve dhe paralelisht po mblidhen fonde.

(A.B. Dosja.al)

Shto Koment